Изреки

Кој ја сака поуката, го сака знаењето; а кој го мрази укорот постапува глупаво.

Добриот човек добива наклонетост од Господ, а човекот што смислува зло Тој го осудува.

Човек не може да се зацврсти со безбожност, а коренот на праведните нема да се поколеба.

Добродетелната жена е венец на својот маж, а онаа што го посрамува е како гнилеж во неговите коски.

Мислите на праведните се исправни, а советите на безбожните се измамливи.

Зборовите на безбожните поставуваат заседа за крв, а устата на чесните ги избавува.

Безбожните се соборени и ги нема, а домот на праведните останува цврст.

Човекот е пофален според своето разбирање, а оној со изопачено срце ќе биде презрен.

Подобро е човек да биде скромен и да има што му треба, отколку да се прави важен, а да нема ни леб.

Праведниот се грижи и за животот на своето животно, а милоста на безбожните е сурова.

Кој ја обработува својата земја ќе има доволно леб, а кој трча по празни работи нема расудување.

Безбожниот копнее по пленот на злите, а коренот на праведните дава плод.

Злите се фаќаат во стапица со гревот на своите усни, а праведниот се избавува од неволја.

Од плодот на својата уста човек се наситува со добро, а делата на неговите раце му се враќаат.

На глупавиот неговиот пат му изгледа исправен, а мудриот го слуша советот.

Глупавиот веднаш го покажува својот гнев, а промислениот знае да ја премолчи навредата.

Кој ја зборува вистината сведочи праведно, а лажниот сведок шири измама.

Непромислените зборови прободуваат како меч, а јазикот на мудрите донесува исцелување.

Вистинитите усни остануваат засекогаш, а лажливиот јазик трае само миг.

Измама има во срцата на оние што смислуваат зло, а радост кај оние што советуваат за мир.

Праведниот нема да биде совладан од зло, а безбожните ќе бидат исполнети со неволја.

Лажливите усни Му се одвратни на Господ, а оние што постапуваат верно Му се угодни.

Промислениот не се фали со своето знаење, а срцето на безумните ја разгласува нивната глупост.

Вредната рака ќе владее, а мрзливата ќе биде принудена да служи.

Грижата го притиска човечкото срце, а добриот збор го развеселува.

Праведниот внимателно го избира својот пат, а патот на безбожните ги заведува.

Мрзливиот не го користи ни она што го уловил, а вредниот човек го цени она што го стекнал.

На патот на праведноста има живот; по таа патека нема смрт.