Изреки

Мудриот син ја прима поуката од својот татко, а потсмевачот не слуша укор.

Од плодот на својата уста човек ќе вкуси добро, а желбата на неверните е насилство.

Кој ја чува својата уста, го чува својот живот; кој непромислено ги отвора усните си навлекува пропаст.

Мрзливиот посакува, но нема ништо; а вредниот ќе биде богато наситен.

Праведниот ја мрази лагата, а безбожниот си навлекува срам и презир.

Праведноста го чува оној што оди чесно, а безбожноста го соборува грешникот.

Некој се прикажува како богат, а нема ништо; друг изгледа сиромашен, а има големо богатство.

Богатството може да послужи како откуп за животот на човекот, а сиромавиот не мора да се плаши од такви закани.

Светлината на праведните свети радосно, а светилката на безбожните ќе згасне.

Од гордоста произлегуваат само расправии, а мудроста е кај оние што прифаќаат совет.

Богатството стекнато набрзина се намалува, а кој собира малку по малку го зголемува.

Долго одложуваната надеж го разболува срцето, а исполнетата желба е дрво на животот.

Кој го презира дадениот збор ќе ги трпи последиците, а кој ја почитува заповедта ќе биде награден.

Учењето на мудриот е извор на животот и го оддалечува човекот од стапиците на смртта.

Доброто расудување носи наклонетост, а патот на неверните е тежок.

Промислениот постапува со знаење, а безумниот ја покажува својата глупост.

Лошиот гласник паѓа во неволја, а верниот пратеник донесува добро.

Сиромаштија и срам го чекаат оној што ја отфрла поуката, а кој го прифаќа укорот ќе биде почитуван.

Исполнетата желба ѝ е слатка на душата, а на безумните им е одвратно да се оддалечат од злото.

Кој оди со мудрите ќе стане мудар, а кој се дружи со безумните ќе си навлече зло.

Несреќата ги следи грешниците, а доброто им се враќа на праведните.

Добриот човек остава наследство и на своите внуци, а богатството на грешникот се чува за праведниот.

Нивата на сиромавиот може да даде изобилна храна, но неправдата може сѐ да уништи.

Кој ја штеди прачката го мрази својот син, а кој го љуби навреме го воспитува.

Праведниот јаде додека не се насити, а стомакот на безбожните останува празен.