Изреки

Сине мој, внимавај на мојата мудрост и внимателно слушај го моето разбирање,

за да го зачуваш расудувањето и твоите усни да го чуваат знаењето.

Усните на туѓата жена капат мед и нејзините зборови се помазни од масло,

но на крајот таа е горчлива како пелин и остра како меч со две острици.

Нејзините нозе се спуштаат кон смртта, а чекорите ѝ водат кон гробот.

Таа не се грижи за патот на животот; нејзините патеки скршнуваат, а таа и не го забележува тоа.

Затоа сега, синови, слушајте ме и не отстапувајте од зборовите на мојата уста.

Држи го својот пат далеку од неа и не приближувај се до вратата на нејзиниот дом,

за да не им ја предадеш својата чест на други и годините од својот живот на сурови луѓе,

туѓинци да не се наситат од твојата сила, а плодот од твојата работа да не заврши во туѓ дом.

На крај ќе офкаш, кога телото и силата ќе ти се истрошат,

и ќе речеш: „Како можев да ја мразам поуката и моето срце да го презира укорот!

Не ги слушав своите учители и не им обрнував внимание на оние што ме поучуваа.

За малку ќе западнев во целосна пропаст среде собранието и заедницата.“

Пиј вода од својот бунар и свежа вода од сопствениот извор.

Зар твоите извори треба да се разлеваат по улиците и твоите водни потоци по плоштадите?

Нека бидат само твои, а не заеднички со туѓинци.

Нека биде благословен твојот извор и радувај се со жената на својата младост.

Таа нека ти биде како мила срна и прекрасна кошута; нејзините гради нека те наситуваат во секое време и нејзината љубов постојано нека те занесува.

Зошто, сине мој, да се занесуваш по туѓа жена и да ја прегрнуваш прељубницата?

Зашто патиштата на човекот се пред Господовите очи и Тој внимателно ги гледа сите негови патеки.

Безбожниот ќе биде фатен во сопствените беззаконија; јажињата на неговиот грев ќе го врзат.

Ќе умре затоа што ја отфрлил поуката и ќе застрани поради својата голема глупост.