Изреки

Слушајте, синови, татковска поука; внимавајте за да стекнете разбирање.

Зашто ви давам добра поука; не го оставајте моето учење.

И јас бев син на својот татко, нежен и многу драг на својата мајка.

Тој ме поучуваше и ми велеше: „Чувај ги моите зборови во своето срце; пази ги моите заповеди и ќе живееш.

Стекнувај мудрост, стекнувај разбирање; не заборавај ги зборовите на мојата уста и не отстапувај од нив.

Не оставај ја мудроста и таа ќе те чува; љуби ја и таа ќе те заштитува.

Најважно е да стекнеш мудрост; затоа стекнувај мудрост, а со сѐ што имаш стекнувај и разбирање.

Цени ја високо и таа ќе те возвиши; прегрни ја и ќе ти донесе чест.

Ќе ти стави прекрасен венец на главата и ќе те украси со славна круна.“

Слушај, сине мој, и прими ги моите зборови, и годините на твојот живот ќе се умножат.

Те поучувам на патот на мудроста и те водам по прави патеки.

Кога ќе одиш, ништо нема да ти го попречува чекорот; кога ќе трчаш, нема да се сопнеш.

Држи се цврсто за поуката и не пуштај ја; чувај ја, зашто таа е твојот живот.

Не стапнувај на патот на безбожните и не оди по патеката на злите.

Избегнувај ја; не поминувај по неа. Сврти се од неа и продолжи понатаму.

Зашто тие не можат да заспијат ако не направат зло; сонот им бега ако не соборат некого.

Јадат леб стекнат со беззаконие и пијат вино стекнато со насилство.

Но патеката на праведните е како светлината на зората, која свети сѐ посилно додека не стане полн ден.

Патот на безбожните е како густа темнина; тие не знаат од што ќе се сопнат.

Сине мој, внимавај на моите зборови и внимателно слушај што ти зборувам.

Не губи ги од вид; чувај ги длабоко во своето срце,

зашто тие се живот за оние што ги наоѓаат и здравје за целото нивно тело.

Над сѐ друго, чувај го своето срце, зашто од него извира животот.

Отстрани ја од себе измамливата уста и држи ги далеку изопачените зборови.

Твоите очи нека гледаат право напред, а погледот нека ти биде насочен пред тебе.

Внимателно избирај ја патеката по која одиш и сите твои патишта нека бидат сигурни.

Не свртувај ни десно ни лево; држи ја својата нога подалеку од злото.