Псалми

Моето срце е подготвено, Боже; ќе пеам и ќе Ти свирам од сета своја душа.

Разбудете се, лиро и харфо! Со песна ќе ја разбудам зората.

Господи, ќе Ти благодарам пред народите и ќе Ти пеам пофалба меѓу племињата.

Зашто Твојата милост се издигнува над небесата, а Твојата верност стигнува до облаците.

Возвиши се над небесата, Боже, и нека се рашири Твојата слава над целата земја.

Спаси нѐ со Својата десна рака и одговори ми, за да бидат избавени оние што ги сакаш.

Бог проговори од Својата светост: „Ќе се радувам; ќе го разделам Шехем и ќе ја измерам долината Сукот.

Мој е Гилад и Моја е Манасија; Ефрем е заштита на Мојата глава, а Јуда е Мојот владетелски стап.

Моав е Мој сад за миење; врз Едом ќе ја фрлам Својата обувка, а над Филистеја победнички ќе воскликнувам.“

Кој ќе ме одведе до утврдениот град? Кој ќе ме доведе сѐ до Едом?

Зар не Ти, Боже, иако нѐ отфрли и повеќе не излегуваше со нашите војски?

Помогни ни против непријателот, зашто човечката помош не може да нѐ спаси.

Со Бог ќе вршиме храбри дела, и Тој ќе ги згази нашите непријатели.