Псалми

Го љубам Господ, зашто го слушна мојот глас и моите молби.

Тој го приклони Своето уво кон мене, и затоа ќе Го повикувам сѐ додека сум жив.

Јажињата на смртта ме обвиткаа и маките на гробот ме стегнаа; ме снајдоа тага и неволја.

Тогаш го повикав Господ по име: „Господи, Те молам, избави ја мојата душа!“

Благ и праведен е Господ; нашиот Бог е полн со милост.

Господ ги чува простодушните; кога бев беспомошен, Тој ме спаси.

Врати се во својот мир, душо моја, зашто Господ ти направи многу добро.

Ти ја избави мојата душа од смрт, моите очи од солзи и моите нозе од сопнување.

Ќе одам пред Господ додека сум во земјата на живите.

Верував и затоа зборував, иако минував низ голема мака.

Во својата вознемиреност реков: „Секој човек може да измами.“

Како да Му возвратам на Господ за сите добрини што ми ги направи?

Ќе ја подигнам чашата на спасението и ќе го повикам Господовото име.

Ќе ги исполнам своите завети пред Господ, и тоа пред целиот Негов народ.

Скапоцена е во Господовите очи смртта на оние што Му припаѓаат.

О, Господи, навистина сум Твој слуга; Твој слуга сум, син на Твојата слугинка, а Ти ги одврза моите окови.

Ќе Ти принесам жртва од благодарност и повторно ќе го повикам Господовото име.

Ќе ги исполнам заветите што Му ги дадов на Господ, пред очите на целиот Негов народ,

и тоа во дворовите на Господовиот дом, среде тебе, Ерусалиме. Алилуја!