Псалми

Не нам, Господи, не нам, туку на Своето име дај слава, заради Својата милост и верност.

Зошто народите да прашуваат: „Каде е сега нивниот Бог?“

Нашиот Бог е на небесата и го прави сето она што Му е угодно.

А нивните идоли се само сребро и злато, дело направено со човечки раце.

Имаат уста, но не можат да зборуваат; имаат очи, но не можат да гледаат.

Имаат уши, но не слушаат; имаат нос, но не можат да мирисаат.

Имаат раце, но не допираат; имаат нозе, но не одат, и никаков глас не излегува од нивното грло.

Какви што се тие, такви ќе станат и оние што ги прават, како и секој што ја положува својата надеж во нив.

Израеле, надевај се на Господ! Тој е нивната помош и нивниот штит.

Аронов доме, надевајте се на Господ! Тој е нивната помош и нивниот штит.

Вие што имате страв од Господ, надевајте се на Него! Тој е нивната помош и нивниот штит.

Господ не нѐ заборави и ќе нѐ благослови; ќе го благослови Израелевиот дом и ќе го благослови Ароновиот дом.

Ќе ги благослови сите што имаат страв од Господ, и малите и големите.

Господ нека ве умножува сѐ повеќе, и вас и вашите деца.

Вие сте благословени од Господ, Создателот на небото и земјата.

Небесата се Господови, а земјата им ја даде на луѓето.

Мртвите не Го фалат Господ, ниту оние што слегуваат во тишината на смртта.

Но ние ќе Го славиме Господ отсега и довека. Алилуја!