Псалми

Славете го Господовото име; славете Го, вие Господови слуги,

вие што стоите во Господовиот дом и во дворовите на домот на нашиот Бог.

Славете Го Господ, зашто Тој е добар; пејте му пофалби на Неговото име, зашто е прекрасно.

Зашто Господ го избра Јаков за Себе, а Израел го зеде како Своја сопственост.

Јас знам дека Господ е велик и дека нашиот Господ е над сите богови.

Господ прави сѐ што ќе посака – на небото и на земјата, во морињата и во сите длабочини.

Тој ги крева облаците од краевите на земјата, создава молњи со дождот и ги изведува ветровите од Своите ризници.

Тој ги погоди сите првородени во Египет, и кај луѓето и кај добитокот.

Среде тебе, Египте, испрати знаци и чуда против фараонот и против сите негови слуги.

Тој порази големи народи и погуби моќни цареви:

го порази Сихон, аморејскиот цар, Ог, башанскиот цар, како и сите ханаански царства.

Потоа нивната земја ја даде како наследство, како наследство на Својот народ Израел.

Твоето име, Господи, трае довека; споменот за Тебе останува од поколение во поколение.

Зашто Господ ќе му донесе правда на Својот народ и ќе се смилува над Своите слуги.

Идолите на народите се само сребро и злато, направени со човечки раце.

Уста имаат, но не зборуваат; очи имаат, но ништо не гледаат.

Имаат уши, но не слушаат, и во нивната уста нема ни здив.

Какви што се тие, такви ќе станат и оние што ги прават, како и секој што се надева на нив.

Израелев доме, славете Го Господ! Аронов доме, славете Го Господ!

Левиев доме, славете Го Господ! Вие што имате страв од Господ, славете Го Господ!

Од Сион нека биде прославен Господ, Кој живее во Ерусалим. Алилуја!