Псалми

Господи, царот се радува на Твојата сила; колкава е неговата радост поради Твоето спасение!

Ти му ја исполни желбата на срцето и не ја одби молбата на неговите усни.

Го пресретна со изобилни благослови и му стави на главата круна од чисто злато.

Од Тебе побара живот, а Ти му подари долг живот, во вечни векови.

Голема е неговата слава поради спасението што му го даде; со чест и величие го облече.

Го направи благослов за сите времиња и го исполни со радост во Своето присуство.

Царот се надева на Господ и поради милоста на Севишниот нема да се поколеба.

Твојата рака ќе ги пронајде сите Твои непријатели; Твојата десница ќе ги стигне оние што Те мразат.

Кога ќе се појавиш во Својот гнев, ќе ги направиш како огнена печка; Господ ќе ги проголта во Својот гнев и огнот ќе ги изгори.

Ќе го истребиш нивниот плод од земјата и ќе го отстраниш нивното потомство од човечкиот род.

Иако намислија зло против Тебе и подготвија заговор, нема да успеат.

Ќе ги натераш да се свртат и да бегаат кога ќе ги насочиш кон нив стрелите од Својот лак.

Возвиши се, Господи, во Својата сила! Ние ќе пееме и ќе ја прославуваме Твојата моќ.