Псалми

Беззаконието му шепоти на безбожниот длабоко во срцето; пред неговите очи нема страв од Бог.

Тој самиот се залажува, убедувајќи се дека неговото зло нема да биде откриено и осудено.

Зборовите од неговата уста се зло и измама; престанал да постапува мудро и да прави добро.

Дури и на својата постела смислува зло; намерно застанува на лош пат и воопшто не го мрази злото.

Господи, Твојата милост се протега до небесата, а Твојата верност до облаците.

Твојата праведност е како величествените планини, а Твоите судови се како големата бездна; Ти, Господи, ги чуваш и луѓето и животните.

Колку е драгоцена Твојата милост, Боже! Луѓето наоѓаат засолниште под сенката на Твоите крилја.

Тие се наситуваат од изобилието на Твојот дом, а Ти им даваш да пијат од реката на Своите радости.

Кај Тебе е самиот извор на животот; во Твојата светлина и ние гледаме светлина.

Продолжи да им ја покажуваш Својата милост на оние што Те познаваат, а Својата праведност на оние со искрено срце.

Не дозволувај ногата на горделивиот да ме згази, ниту раката на безбожникот да ме протера.

Ете, таму паднаа оние што прават зло; соборени се и повеќе не можат да станат.