Псалми

Голем е Господ и достоен за сета пофалба во градот на нашиот Бог, на Својот свет рид.

Прекрасен по својата височина и радост на целата земја е ридот Сион; на неговата северна страна е градот на великиот Цар.

Во неговите дворци Бог се откри како сигурно засолниште.

Ете, царевите се собраа и заедно тргнаа против него.

Но штом го видоа, се вчудовидија; ги обзеде страв и побегнаа.

Таму ги фати трепет, болка како кај жена што раѓа.

Како со источен ветер, Ти ги разбиваш тарсиските кораби.

Она што порано го слушавме, сега го видовме со свои очи во градот на Господ над војските, во градот на нашиот Бог; Бог ќе го утврди довека.

Боже, среде Твојот храм размислуваме за Твојата милост.

Како што е големо Твоето име, Боже, така и Твојата пофалба стигнува до краиштата на земјата; Твојата десна рака е полна со праведност.

Нека се весели ридот Сион и нека се радуваат Јудините градови поради Твоите праведни судови.

Обиколете го Сион, прошетајте околу него и избројте ги неговите кули.

Добро разгледајте ги неговите бедеми и дворци, за да му раскажете за нив на идното поколение.

Зашто овој Бог е наш Бог во вечни векови; Тој ќе нѐ води до самиот крај.