Псалми

Бог над боговите, Господ, проговори и ја повика целата земја, од изгрејсонце до зајдисонце.

Од Сион, совршен во убавина, Бог засветли.

Нашиот Бог доаѓа и нема да остане нем; пред Него оди оган што проголтува, а околу Него беснее силна бура.

Одозгора ги повикува небесата, а и земјата, за да му суди на Својот народ:

„Соберете ги пред Мене оние што Ми припаѓаат, оние што склучија завет со Мене преку жртва.“

Небесата ќе ја објават Неговата праведност, зашто самиот Бог е Судијата.

„Слушај, народе Мој, зашто Јас ќе зборувам; Израеле, ќе сведочам против тебе: Јас сум Бог, твојот Бог.

Нема да те укорувам поради твоите жртви, ниту поради жртвите паленици што постојано ги принесуваш пред Мене.

Не Ми треба јунец од твојата куќа, ниту јарец од твоите стада,

Зашто Мои се сите животни во шумите и сиот добиток на илјадниците ридови.

Ги познавам сите планински птици, а и полските животни Ми припаѓаат.

Дури и кога би огладнел, не би ти кажал тебе, зашто Мој е светот и сѐ што е во него.

Зар мислиш дека Јас јадам месо од јунци или пијам крв од јарци?

Принеси Му на Бог благодарност како жртва и исполни ги своите завети пред Севишниот.

Повикај Ме во денот на неволјата; Јас ќе те избавам, а ти ќе Ме прославиш.“

А на безбожниот Бог му вели: „Со какво право ги разгласуваш Моите уредби и го земаш Мојот завет на своите усни,

а во исто време ја мразиш поуката и ги фрлаш Моите зборови зад својот грб?

Кога ќе видиш крадец, му се придружуваш, а со прељубниците се здружуваш.

Устата ја предаваш на зло, а со јазикот плетеш измама.

Седиш и зборуваш против сопствениот брат; го клеветиш синот на својата мајка.

Сето тоа го правеше, а Јас молчев, па помисли дека сум ист како тебе. Но ќе те укорувам и сѐ ќе ти поставам пред очи.

Разберете го ова, вие што Го заборавате Бог, за да не ве раскинам кога нема да има кој да ве избави.

Оној што принесува благодарност како жртва Ме прославува; а на оној што внимава на својот пат ќе му го покажам Божјото спасение.“