Псалми

Зошто се фалиш со злото, силнику? Божјата милост трае постојано.

Твојот јазик смислува погибел; остар е како брич и дејствува измамливо.

Го сакаш злото повеќе од доброто, а лагата повеќе од вистината.

Ги сакаш сите зборови што носат пропаст, измамлив јазику.

Затоа Бог ќе те урне засекогаш; ќе те зграпчи, ќе те извлече од твојот шатор и ќе те искорени од земјата на живите.

Праведните ќе го видат тоа и ќе се исполнат со стравопочит; ќе му се потсмеат и ќе речат:

„Еве го човекот што не Го направи Бог своја тврдина, туку се надеваше на своето големо богатство и се засилуваше преку сопственото зло.“

А јас сум како зелена маслина во Божјиот дом; во Божјата милост ќе се надевам во вечни векови.

Ќе Те славам довека за она што си го направил, и пред Твоите свети ќе се надевам на Твоето име, зашто е добро.