Псалми

Цела земјо, извикај Му радосно на Бог!

Пејте за славата на Неговото име и прославете Го со величествена пофалба.

Кажете Му на Бог: „Колку се величествени Твоите дела! Пред големината на Твојата сила и Твоите непријатели ќе се преправаат дека Ти се покоруваат.

Целата земја ќе Ти се поклонува и ќе Ти пее; ќе пее во чест на Твоето име.“

Дојдете и видете ги Божјите дела; величествени се делата што ги прави меѓу луѓето.

Тој го претвори морето во суво; пеш ја преминаа реката. Таму се радувавме во Него.

Со Својата сила Тој владее довека; Неговите очи ги набљудуваат народите. Бунтовниците нека не се воздигнуваат.

Славете Го нашиот Бог, народи, и нека се чуе гласот на Неговата пофалба.

Тој ни го одржува животот и не дозволува нашите нозе да се поколебаат.

Зашто Ти, Боже, нѐ испита и нѐ прочисти како што се прочистува среброто.

Нѐ воведе во мрежа и ни стави тежок товар врз плеќите.

Дозволи луѓе да поминат над нашите глави; поминавме низ оган и вода, но Ти нѐ изведе на место полно со изобилие.

Ќе влезам во Твојот дом со жртви паленици и пред Тебе ќе ги исполнам своите завети,

оние што ги изговорија моите усни и што ги вети мојата уста кога бев во неволја.

Ќе Ти принесам жртви паленици од угоени овни со мирис на темјан; ќе принесам и волови и јарци.

Дојдете и слушнете, сите што имате страв од Бог, и ќе ви раскажам што направи Тој за мене.

Кон Него повикав со устата и со јазикот Го возвеличив.

Да го негував беззаконието во своето срце, Господ немаше да ме слушне.

Но Бог навистина ме чу; внимаваше на гласот на мојата молитва.

Славен нека биде Бог, Кој не ја отфрли мојата молитва и не ја оддалечи Својата милост од мене.