Псалми

Дојдете, да Му пееме на Господ и радосно да воскликнеме кон Карпата на нашето спасение.

Да излеземе пред Него со благодарност и со псалми радосно да Му пееме.

Зашто Господ е велик Бог и голем Цар над сите богови.

Во Неговата рака се земните длабочини, а Негови се и највисоките планински врвови.

Негово е морето, зашто Тој го создаде, а Неговите раце го обликуваа и копното.

Дојдете да се поклониме и да паднеме ничкум; да клекнеме пред Господ, Оној што нѐ создаде.

Зашто Тој е наш Бог, а ние сме народот на Неговото пасиште и овците што ги води Неговата рака. Денес, ако го слушнете Неговиот глас,

не стврднувајте ги своите срца како кај Мерива, како во денот кога Ме искушувавте во пустината,

каде што вашите татковци Ме искушуваа и Ме испитуваа, иако со свои очи ги видоа Моите дела.

Четириесет години се гневев на тоа поколение и реков: „Тоа е народ што заблудува во срцето и не ги познава Моите патишта.“

Затоа во Својот гнев се заколнав: „Тие нема да влезат во Мојата почивка.“