1 Коринтјаните

Глава 3

1
А јас, браќа, не можев да ви зборувам како на духовни, туку како на телесни, како на мали деца во Христос.
2
Со млеко ве хранев, а не со цврста храна, зашто уште не можевте да ја примите. Но ни сега не можете,
3
бидејќи уште сте телесни. И навистина, бидејќи меѓу вас има завист и кавга, не сте ли телесни и не живеете ли како обични луѓе?
4
Зашто, кога еден зборува: „Јас сум Павлов“, а друг: „Јас сум Аполосов“, не сте ли само луѓе?
5
Кој е Аполос, а кој е Павле? Само слуги преку кои поверувавте, секој според она што му го дал Господ.
6
Јас посадив, Аполос полеваше, но Бог даде да расте.
7
Така, ниту оној што сади е нешто, ниту оној што полева, туку Бог, Кој дава да расте.
8
Оној што сади и оној што полева се едно, но секој ќе ја прими својата награда според својот труд.
9
Зашто ние сме Божји соработници, а вие сте Божја нива и Божја градба.
10
Според Божјата благодат што ми е дадена, како мудар главен градител поставив темел, а друг гради врз него. Но секој нека внимава како гради.
11
Зашто никој не може да постави друг темел освен веќе поставениот, а тоа е Исус Христос.
12
Ако некој ѕида врз таа основа со злато, сребро, драгоцени камења, дрво, сено или слама,
13
делото на секого ќе стане јавно, зашто Денот ќе го покаже. Тој Ден ќе се открие во оган, а огнот ќе испита какво е делото на секого.
14
Ако остане делото што некој го изградил врз темелот, тој ќе прими награда.
15
Ако нечие дело изгори, тој ќе претрпи загуба; самиот, пак, ќе се спаси, но како низ оган.
16
Не знаете ли дека вие сте Божји храм и дека Божјиот Дух живее во вас?
17
Ако некој го уништи Божјиот храм, него Бог ќе го уништи; зашто Божјиот храм е свет, а тоа сте вие.
18
Никој да не се мами. Ако некој меѓу вас мисли дека е мудар според овој свет, нека стане безумен за да биде вистински мудар.
19
Зашто мудроста на овој свет е безумство пред Бог, како што е напишано: „Тој ги фаќа мудрите во нивното лукавство.“
20
И пак: „Господ знае дека мислите на мудрите се суетни.“
21
Затоа никој да не се фали со луѓе, зашто сѐ е ваше:
22
било Павле, Аполос или Кифа; било светот, животот или смртта; било сегашноста или иднината – сѐ е ваше,
23
а вие сте Христови, а Христос е Божји.