1 Јован

Деца мои, ова ви го пишувам за да не грешите. Но ако некој згреши, имаме Застапник пред Таткото – Исус Христос, Праведникот.

Тој е жртва за помирување за нашите гревови; и не само за нашите, туку и за гревовите на целиот свет.

По ова знаеме дека Го познаваме: ако ги пазиме Неговите заповеди.

Оној што вели: „Го познавам“, а не ги пази Неговите заповеди, лажец е и вистината не е во него.

Но кој го пази Неговиот збор, во него Божјата љубов навистина достигнала совршенство. По ова знаеме дека сме во Него:

оној што вели дека останува во Него, должен е и самиот да живее како што живееше Тој.

Мили мои, не ви пишувам нова заповед, туку стара заповед што ја имавте од почетокот. Старата заповед е зборот што го чувте.

Сепак, ви пишувам нова заповед, која е вистинита и во Него и во вас, зашто темнината поминува, а вистинската светлина веќе свети.

Оној што вели дека е во светлината, а го мрази својот брат, сѐ уште е во темнината.

Оној што го љуби својот брат останува во светлината, и во него нема ништо што би го навело на сопнување.

Но оној што го мрази својот брат е во темнината, живее во темнината и не знае каде оди, зашто темнината му ги заслепила очите.

Ви пишувам вам, чеда, зашто гревовите ви се простени поради Неговото име.

Ви пишувам вам, татковци, зашто Го познавте Оној Кој е од почетокот. Ви пишувам вам, млади луѓе, зашто го победивте злиот. Ви напишав вам, деца, зашто Го познавте Таткото.

Ви напишав вам, татковци, зашто Го познавте Оној Кој е од почетокот. Ви напишав вам, млади луѓе, зашто сте силни и Божјиот збор останува во вас и го победивте злиот.

Не сакајте го светот, ниту она што е во светот. Ако некој го сака светот, љубовта кон Таткото не е во него.

Зашто сѐ што е во светот — желбата на телото, желбата на очите и гордоста на животот — не е од Таткото, туку од светот.

Светот поминува, а и неговата желба; но оној што ја извршува Божјата волја останува довека.

Чеда, последниот час е. Како што чувте дека доаѓа антихристот, така и сега се појавија многу антихристи; по тоа знаеме дека е последниот час.

Тие излегоа од нас, но не беа од нас. Зашто, ако беа од нас, ќе останеа со нас. Но излегоа, за да стане јасно дека тие не се од нас.

А вие имате помазание од Светиот и сите знаете.

Не ви напишав затоа што не ја знаете вистината, туку затоа што ја знаете и затоа што ниедна лага не произлегува од вистината.

Кој е лажливец, ако не оној што одрекува дека Исус е Христос? Антихрист е оној што ги одрекува Таткото и Синот.

Секој што Го одрекува Синот, Го нема ни Таткото; а кој Го признава Синот, Го има и Таткото.

Во вас нека остане она што го чувте од почетокот. Ако во вас остане она што го чувте од почетокот, и вие ќе останете во Синот и во Таткото.

А ова е ветувањето што Тој ни го вети: вечниот живот.

Ова ви го напишав за оние што се обидуваат да ве измамат.

Но во вас останува помазанието што го примивте од Него и немате потреба некој да ве поучува. Неговото помазание ве поучува за сѐ, тоа е вистинито и не е лага; и како што ве научи, така останете во Него.

А сега, чеда, останете во Него, за да имаме смелост кога ќе се јави и да не се посрамиме пред Него при Неговото доаѓање.

Ако знаете дека Тој е праведен, тогаш знаете и дека секој што постапува праведно е роден од Него.