1 Петар

И така, оставајќи ги настрана секоја злоба, секаква измама и лицемерство, завист и сите клевети,

како новороденчиња, копнејте по чистото духовно млеко, за преку него да пораснете кон спасението,

ако сте вкусиле дека Господ е добар.

Пристапувајќи кон Него како кон жив камен, отфрлен од луѓето, но избран од Бог и скапоцен пред Него,

и вие самите, како живи камења, изградувајте се како духовен дом, за свето свештенство, за да принесувате духовни жртви, прифатливи за Бог, преку Исус Христос.

Зашто вака стои во Писмото: „Еве, поставувам на Сион Камен темелник, одбран и скапоцен, и кој верува во Него, нема да се засрами.“

За вас, кои верувате, овој Камен е скапоцен; а за оние што не веруваат: „Каменот што го отфрлија ѕидарите стана камен-темелник“,

и „камен за сопнување и карпа за соблазнување“. Тие се сопнуваат, бидејќи му се непокорни на зборот, за што се и определени.

А вие сте избран род, царско свештенство, свет народ, народ што е Божја сопственост, за да ги објавувате величествените дела на Оној Кој ве повика од темнината во Својата чудесна светлина.

Вие кои некогаш не бевте народ, сега сте Божји народ; вие кои некогаш не добивте милост, сега сте помилувани.

Мили мои, ве молам, како туѓинци и дојденци, да се воздржувате од желбите на телото, кои војуваат против душата.

Живејте чесно меѓу незнабошците, за оние што ве клеветат како злосторници, кога ќе ги видат вашите добри дела, да Го прослават Бог во денот на посетата.

Заради Господ, покорувајте ѝ се на секоја човечка власт: било на царот како врховен владетел,

било на управителите како негови пратеници, испратени да ги казнуваат злосторниците, а да ги пофалуваат оние што прават добро.

Зашто ова е Божја волја: правејќи добро, да го замолкнете незнаењето на неразумните луѓе.

Живејте како слободни, но не користете ја слободата како покривка за злото, туку како Божји слуги.

Почитувајте ги сите, сакајте го братството, имајте страв од Бог, почитувајте го царот!

А вие, слугите, покорувајте им се на своите господари со сета почит, не само на добрите и кротките, туку и на неправедните.

Зашто тоа е угодно пред Бог ако човек, заради совеста пред Него, поднесува маки кога неправедно страда.

Инаку, каква е пофалбата ако трпите кога ве казнуваат за вашите престапи? Но ако страдате и трпите кога правите добро, тоа е угодно пред Бог.

Зашто за тоа сте повикани, бидејќи и Христос страдаше за вас и ви остави пример, за да одите и вие по Неговите стапки.

Тој не направи грев и не се најде измама во Неговата уста.

Тој, Кој беше навредуван, не возвраќаше со навреда; кога страдаше – не се закануваше, туку се довери Себеси на Оној Кој суди праведно.

Тој Сам во Своето тело ги понесе нашите гревови на дрвото, за ние, откако умревме за гревовите, да живееме за праведноста. Преку Неговите рани бевте исцелени.

Зашто бевте како овци што скитаат, но сега се вративте кај Пастирот и Чуварот на вашите души..