1 Петар

Глава 4

1
И така, бидејќи Христос пострада во телото, вооружете се и вие со истата мисла, зашто оној што пострадал во телото прекинал со гревот,
2
и преостанатото време во телото да не го проживеете според човечките желби, туку според Божјата волја,
3
бидејќи доволно е тоа што во минатото ја извршувавте волјата на незнабожците, живеејќи во сладострастие, желби, пијанство, гозби, опивање и гнасно идолопоклонство.
4
Затоа се чудат што вие не трчате со нив во истата крајност на развратот, и затоа ве клеветат.
5
Но тие ќе Му дадат сметка на Оној Кој е готов да им суди на живите и на мртвите.
6
За таа цел им беше проповедано Евангелието и на оние кои се мртви: иако се судени во телото како луѓе, да живеат во дух според Бог.
7
А крајот на сѐ се приближи. Затоа бидете разумни и трезвени, за да можете да се молите.
8
Пред сѐ, имајте силна љубов меѓу себе, зашто љубовта покрива многу гревови.
9
Бидете гостољубиви еден кон друг, без негодување.
10
Секој од вас, според дарот што го примил, нека го користи за да им служи на другите како добри управители на многукратната Божја благодат.
11
Ако некој зборува, нека зборува како оној што ги пренесува Божјите зборови; ако некој служи, нека служи со силата што Бог ја дава, за Бог да се прослави во сѐ преку Исус Христос, Кому Му припаѓаат славата и власта во вечни векови. Амин.
12
Мили мои, не чудете се на огненото испитување што ве снајде за да ве испита, како да ви се случува нешто необично,
13
туку радувајте се што соучествувате во Христовите страдања, за да можете да се радувате и веселите при откровението на Неговата слава.
14
Блажени сте ако ве навредуваат поради Христовото име, зашто Духот на славата, Божјиот Дух, почива врз вас.
15
Никој од вас да не страда како убиец, или крадец, или злосторник или како оној што се меша во туѓи работи;
16
но ако страда како христијанин, да не се срами, туку поради тоа да Го слави Бог,
17
зашто време е судот да започне од Божјиот дом, а ако почнува прво од нас, каков ли ќе им биде крајот на оние кои не му се покоруваат на Божјото Евангелие?
18
И „ако праведникот одвај се спасува, што ќе стане со безбожникот и грешникот?“
19
Затоа и оние кои страдаат по Божја волја, да Му ги доверат своите души на верниот Создател, правејќи добро.