1 Петар

Затоа старешините меѓу вас ги поттикнувам јас, како старешина заедно со нив, сведок на Христовите страдања и учесник во славата што ќе се открие:

пасете го Божјото стадо што е меѓу вас, надгледувајќи го не со принуда, туку доброволно, како што Бог сака; не за нечесна печалба, туку со голема желба;

не како да господарите над оние што ви се доверени, туку бидете пример на стадото.

А кога ќе се појави Врховниот Пастир, ќе примите венец на славата што не венее.

Така и вие помладите, покорувајте им се на старешините. А сите облечете се во понизност еден кон друг, зашто „Бог им се противи на горделивите, а на понизните им дава благодат.“

И така, понизете се под моќната Божја рака, за да ве возвиши во свое време.

Сите свои грижи фрлете ги врз Него, зашто Тој се грижи за вас.

Бидете со трезвен дух и бдејте: вашиот противник, ѓаволот, оди наоколу како лав што рика, барајќи некого да го проголта.

Спротивете му се, цврсти во верата, знаејќи дека истите страдања им се случуваат и на вашите браќа по светот.

А откако ќе претрпите уште малку, Бог на секоја благодат, Кој ве повика во Христос кон Својата вечна слава, Самиот ќе ве усоврши, ќе ве потврди, ќе ве зајакне и ќе ве утврди.

Нему Му припаѓа власта во сите векови. Амин!

Преку Силван, кого го сметам за верен брат, ви напишав накратко, за да ве поттикнам и да ви посведочам дека ова е вистинската Божја благодат. Во неа стојте цврсто.

Ве поздравува црквата во Вавилон, избрана заедно со вас, како и мојот син Марко.

Поздравете се еден со друг со бакнеж на љубов. Мир на сите вас што сте во Христос.