1 Самоил

Самоил му рече на Саул: „Господ ме испрати да те помазам за цар над Неговиот народ Израел. Затоа сега послушај ги зборовите на Господ.

Вака вели Господ над војските: ‚Се сеќавам што му направи Амалик на Израел, како му се спротивстави на патот кога излегуваше од Египет.

Затоа сега оди и порази ги Амаличаните. Целосно уништи сѐ што имаат и не поштедувај ги. Погуби маж и жена, дете и доенче, говедо и овца, камила и магаре.‘“

Саул го повика народот и го преброи во Телаим: имаше двеста илјади пешаци од Израел и десет илјади Јудини мажи.

Саул дојде до еден амалички град и постави заседа во долината.

Потоа им рече на Кенејците: „Одете, одделете се и слезете од средината на Амаличаните, за да не ве уништам заедно со нив. Вие покажавте добрина кон сите Израелеви синови кога излегуваа од Египет.“ Така Кенејците се одделија од Амаличаните.

Саул ги порази Амаличаните од Евила до Сур, кој е источно од Египет.

Го фати жив Агаг, амаличкиот цар, а целиот народ го уништи со остар меч.

Но Саул и народот го поштедија Агаг, како и најдобрите овци, говеда, угоени животни, јагниња и сѐ што беше добро. Не сакаа да ги уништат. Целосно уништија само сѐ што беше безвредно и слабо.

Тогаш Господовиот збор му дојде на Самоил:

„Жалам што го поставив Саул за цар, зашто се одврати од Мене и не ги исполни Моите заповеди.“ Самоил се разгневи и цела ноќ викаше кон Господ.

Самоил стана рано за да го пресретне Саул, но му јавија: „Саул дојде во Кармил и си подигна споменик. Потоа се сврте, замина и слезе во Галгал.“

Кога Самоил дојде кај Саул, Саул му рече: „Благословен да си од Господ! Ја исполнив Господовата заповед.“

Но Самоил праша: „Тогаш што е ова блеење на овци во моите уши и рикање на говеда што го слушам?“

Саул одговори: „Ги донесоа од Амаличаните, зашто народот ги поштеди најдобрите овци и говеда за да Му ги принесе како жртва на Господ, твојот Бог. Останатото целосно го уништивме.“

Тогаш Самоил му рече на Саул: „Доста! Ќе ти кажам што ми рече Господ оваа ноќ.“ Саул одговори: „Кажи.“

Самоил рече: „Иако во своите очи беше мал, зар не стана глава на Израелевите племиња? Господ те помаза за цар над Израел.

Господ те испрати на пат и ти рече: ‚Оди и целосно уништи ги грешните Амаличани. Војувај против нив додека не ги истребиш.‘

Зошто не го послуша Господовиот глас, туку се нафрли врз пленот и го направи ова зло пред Господ?“

Саул му рече на Самоил: „Но јас го послушав Господовиот глас! Отидов по патот по кој ме испрати Господ, го доведов амаличкиот цар Агаг, а Амаличаните целосно ги уништив.

Народот од пленот ги зеде овците и говедата, најдоброто од она што беше определено за уништување, за да Му го принесе како жртва на Господ, твојот Бог, во Галгал.“

Но Самоил рече: „Зар жртвите паленици и другите жртви Му се толку мили на Господ колку послушноста кон Господовиот глас? Ете, послушноста е подобра од жртва, а покорноста од овновска маст.

Зашто бунтовноста е како гревот на гатањето, а упорноста како идолопоклонство и безбожност. Бидејќи ти го отфрли Господовиот збор, и Тој те отфрли да не бидеш цар.“

Тогаш Саул му рече на Самоил: „Згрешив, зашто ја прекршив Господовата заповед и твоите зборови. Се уплашив од народот и го послушав нивниот глас.

Затоа сега, те молам, прости ми го гревот и врати се со мене, за да Му се поклонам на Господ.“

Но Самоил му одговори на Саул: „Нема да се вратам со тебе. Ти го отфрли Господовиот збор, а Господ те отфрли да не бидеш цар над Израел.“

Кога Самоил се сврте да си оди, Саул го фати за работ на неговата наметка, и таа се скина.

Тогаш Самоил му рече: „Господ денес го откина Израелевото царство од тебе и му го даде на твој ближен, кој е подобар од тебе.

Израелевата Сила нема да излаже ниту да се предомисли, зашто Тој не е човек за да се предомисли.“

Саул рече: „Згрешив. Но те молам, укажи ми чест сега пред старешините на мојот народ и пред Израел. Врати се со мене, за да Му се поклонам на Господ, твојот Бог.“

Така Самоил се врати по Саул, и Саул Му се поклони на Господ.

Потоа Самоил рече: „Доведете ми го амаличкиот цар Агаг.“ Агаг весело му пристапи, зашто си мислеше: „Сигурно помина горчината на смртта.“

Но Самоил рече: „Како што твојот меч остави многу жени без деца, така и твојата мајка ќе остане без син меѓу жените.“ И Самоил го исече Агаг пред Господ во Галгал.

Потоа Самоил отиде во Рама, а Саул се врати во својот дом во Гаваја Саулова.

До денот на својата смрт Самоил повеќе не го виде Саул, но тагуваше по него. А Господ жалеше што го постави Саул за цар над Израел.