1 Самоил

Жителите на Киријат-Јарим дојдоа, го зедоа Господовиот ковчег и го однесоа во куќата на Авинадав на ридот. Неговиот син Елеазар го посветија да се грижи за Господовиот ковчег.

Од денот кога ковчегот беше поставен во Киријат-Јарим помина долго време - дваесет години. И целиот Израелев дом со жал се сврте кон Господ.

Тогаш Самоил му рече на целиот Израелев дом: „Ако со сето свое срце се враќате кај Господ, отстранете ги туѓите богови и Астартите од својата средина. Насочете го своето срце кон Господ и служете Му само Нему; тогаш Тој ќе ве избави од раката на Филистејците.“

Така Израелевите синови ги отстранија Ваалите и Астартите и Му служеа само на Господ.

Потоа Самоил рече: „Соберете го целиот Израел во Масфа, и јас ќе Му се молам на Господ за вас.“

Тие се собраа во Масфа, нацрпеа вода и ја излеаја пред Господ. Тој ден постеа и таму признаа: „Згрешивме против Господ.“ А Самоил им судеше на Израелевите синови во Масфа.

Кога Филистејците чуја дека Израелевите синови се собрале во Масфа, филистејските владетели излегоа против Израел. Кога го слушнаа тоа, Израелевите синови се уплашија од Филистејците.

Тие му рекоа на Самоил: „Не престанувај да викаш кон Господ, нашиот Бог, за нас, за да нѐ избави од раката на Филистејците.“

Самоил зеде едно јагне што сѐ уште цицаше и целото Му го принесе на Господ како жртва паленица. Самоил викаше кон Господ за Израел, и Господ му одговори.

Додека Самоил ја принесуваше жртвата паленица, Филистејците се приближија за да го нападнат Израел. Но тој ден Господ загрми со силен гром против Филистејците, ги збуни и тие беа поразени пред Израел.

Израелевите мажи излегоа од Масфа, ги гонеа Филистејците и ги поразуваа сѐ до под Вет-Хар.

Тогаш Самоил зеде еден камен, го постави меѓу Масфа и Сен и го нарече Евен-Езер, велејќи: „Дотука ни помогна Господ.“

Така Филистејците беа покорени и повеќе не навлегуваа во Израелевите предели. Господовата рака беше против Филистејците во сите денови на Самоил.

Градовите што Филистејците ги беа одзеле од Израел, од Акарон до Гет, му беа вратени на Израел. Израел ги ослободи и нивните околни области од раката на Филистејците. А меѓу Израел и Аморејците имаше мир.

Самоил му судеше на Израел во сите денови од својот живот.

Секоја година ги обиколуваше Ветил, Галгал и Масфа и му судеше на Израел во сите тие места.

Потоа се враќаше во Рама, зашто таму беше неговиот дом, и таму му судеше на Израел. Таму Му изгради и жртвеник на Господ.