1 Самоил

Глава 8

1
Кога Самоил остаре, ги постави своите синови за судии над Израел.
2
Неговиот првороден син се викаше Јоил, а вториот Авија. Тие судеа во Вирсавија.
3
Но неговите синови не одеа по неговите патишта. Трчаа по неправедна добивка, земаа поткуп и ја извртуваа правдата.
4
Тогаш сите Израелеви старешини се собраа и дојдоа кај Самоил во Рама.
5
Му рекоа: „Ете, ти остаре, а твоите синови не одат по твоите патишта. Затоа постави ни цар да ни суди, како што имаат сите други народи.“
6
Но на Самоил не му беше мило што рекоа: „Дај ни цар да ни суди.“ Затоа Самоил Му се помоли на Господ.
7
Господ му рече на Самоил: „Послушај го гласот на народот во сѐ што ти зборува, зашто не те отфрлија тебе, туку Мене Ме отфрлија, за да не царувам над нив.
8
Тие постапуваат со тебе како што постапуваа од денот кога ги изведов од Египет до денес: Ме оставаа и им служеа на други богови.
9
Затоа сега послушај го нивниот глас. Но сериозно предупреди ги и кажи им какви права ќе бара царот што ќе владее над нив.“
10
Самоил му ги кажа сите Господови зборови на народот што бараше цар од него.
11
Тој рече: „Вака ќе постапува царот што ќе владее над вас: ќе ги зема вашите синови и ќе ги поставува кај своите бојни коли и кај своите коњи, а некои ќе трчаат пред неговите коли.
12
Ќе ги поставува за заповедници над илјада и над педесет луѓе. Ќе ги тера да му ја обработуваат земјата, да му ја жнеат жетвата и да му изработуваат воено оружје и опрема за бојните коли.
13
Ќе ги зема вашите ќерки за да прават мирисливи масла, да готват и да печат леб.
14
Ќе ги зема вашите најдобри ниви, лозја и маслинови насади и ќе им ги дава на своите слуги.
15
Ќе зема десетина од вашите посеви и лозја и ќе им ја дава на своите дворјани и слуги.
16
Ќе ги зема вашите слуги и слугинки, вашите најдобри млади луѓе и вашите магариња и ќе ги употребува за својата работа.
17
Ќе зема десетина од вашите стада, а вие ќе му бидете слуги.
18
Во тој ден ќе викате поради царот што самите сте го избрале, но Господ нема да ви одговори во тој ден.“
19
Сепак, народот не сакаше да го послуша гласот на Самоил и рече: „Не! Нека има цар над нас,
20
за и ние да бидеме како сите други народи. Нашиот цар нека ни суди, нека оди пред нас и нека ги води нашите војни.“
21
Самоил ги сослуша сите зборови на народот и Му ги повтори на Господ.
22
Господ му рече на Самоил: „Послушај го нивниот глас и постави им цар.“ Тогаш Самоил им рече на Израелевите мажи: „Вратете се секој во својот град.“