1 Солунјаните

Павле, Силван и Тимотеј, до црквата на Солунјаните, која е во Бог Таткото и во Господ Исус Христос: благодат и мир да имате.

Секогаш Му благодариме на Бог за сите вас, спомнувајќи ве постојано во своите молитви,

сеќавајќи се на делото на вашата вера, трудот на вашата љубов и постојаноста на вашата надеж во нашиот Господ Исус Христос, пред Бог, нашиот Татко.

Знаеме, браќа, сакани од Бог, дека сте избрани,

зашто нашето проповедање на Евангелието меѓу вас не беше само со збор, туку и во сила, и во Светиот Дух, и во полна увереност; како што знаете какви бевме меѓу вас поради вас.

И вие се угледавте на нас и на Господ: го примивте Зборот среде големи неволји, но со радоста што ја дава Светиот Дух,

така што им станавте пример на сите верници во Македонија и Ахаја.

Зашто од вас Господовиот Збор се разгласи не само во Македонија и Ахаја, туку и вашата вера во Бог стана позната насекаде, така што нема потреба ние да зборуваме нешто.

Зашто самите луѓе раскажуваат како бевме примени кај вас и како се одвративте од идолите кон Бог, за да Му служите на живиот и вистински Бог

и да Го очекувате од небесата Неговиот Син Исус, Кого Го воскресна од мртвите и Кој нѐ избавува од гневот што доаѓа.