1 Солунјаните

Најпосле, браќа, бараме и ве молиме во Господ Исус, како што примивте од нас упатства како треба да живеете и да Му угодувате на Бог (како што веќе живеете), уште повеќе да изобилувате во тоа.

Имено, знаете какви упатства ви дадовме во името на Господ Исус.

Зашто Божјата волја е вашето осветување: да се воздржувате од блудство,

секој од вас да знае да го владее своето тело во светост и чест,

не во похотна страст, како незнабожците кои не Го познаваат Бог;

никој да не му прави неправда и да не го искористува својот брат во оваа работа, зашто Господ е одмаздник за сите такви работи, како што однапред ви кажавме и сериозно ве предупредивме.

Зашто Бог не нѐ повика на нечистотија, туку на светост.

Затоа, кој го отфрла тоа, не отфрла човек, туку Бог, Кој ви Го дава Својот Свет Дух.

А за братољубието нема потреба да ви пишувам, зашто Самиот Бог ве научи да се љубите едни со други,

а вие го правите тоа кон сите браќа во цела Македонија. Но ве молиме, браќа, уште повеќе да напредувате во тоа

и да се стремите да живеете мирно, да се грижите за своите работи и да работите со своите раце, како што ви заповедавме,

за да се однесувате достоинствено пред оние што се надвор и да не зависите од никого.

Не сакаме, браќа, да останете во незнаење за починатите, за да не жалите како другите кои немаат надеж.

Зашто, ако веруваме дека Исус умре и воскресна, тогаш веруваме и дека Бог, заедно со Исус, ќе ги доведе и оние што починале во Него.

Зашто ова ви го кажуваме преку Господовиот Збор дека ние кои живееме и остануваме до доаѓањето на Господ, нема да ги престигнеме оние што починале;

зашто Самиот Господ ќе слезе од небото со заповеднички повик, со глас на архангел и со Божја труба, и мртвите во Христос ќе воскреснат први.

Потоа ние живите кои останавме, ќе бидеме грабнати заедно со нив во облаците, за да Го сретнеме Господ во воздухот; и така засекогаш ќе бидеме со Господ.

Затоа, утешувајте се едни со други со овие зборови.