1 Солунјаните

Глава 5

1
А за времињата и периодите, браќа, нема потреба да ви се пишува;
2
зашто самите вие добро знаете дека Господовиот Ден ќе дојде како крадец во ноќта.
3
Кога ќе велат: „Мир и безбедност“, тогаш ненадејно ќе дојде пропаст врз нив, како породилни болки врз бремена жена, и нема да можат да избегаат.
4
Но вие, браќа, не сте во темнина, та Денот да ве затече како крадец,
5
зашто сите вие сте синови на светлината и синови на денот. Ние не ѝ припаѓаме на ноќта ниту на темнината.
6
И така, да не спиеме како другите, туку да бдееме и да бидеме трезвени.
7
Зашто оние што спијат, спијат ноќе, а оние што се опиваат, ноќе се опиваат.
8
А ние кои му припаѓаме на денот, да бидеме трезвени, облекувајќи го оклопот на верата и љубовта, а како шлем – надежта на спасението.
9
Зашто Бог не нѐ определи за гнев, туку да добиеме спасение преку нашиот Господ Исус Христос,
10
Кој умре за нас за да живееме заедно со Него, без разлика дали сме будни или спиеме.
11
Затоа охрабрувајте се меѓусебно и изградувајте се едни со други, токму така како што и правите!
12
Ве молиме, браќа, да ги почитувате оние што вредно работат меѓу вас, ве предводат во Господ и ве опоменуваат.
13
Имајте ги во особена почит и љубов поради нивното дело. Живејте во мир едни со други.
14
Ве молиме уште, браќа, опоменувајте ги неуредните, охрабрувајте ги малодушните, помагајте им на немоќните и бидете трпеливи со сите луѓе.
15
Гледајте никој никому да не враќа зло за зло, туку секогаш стремете се кон доброто едни за други и за сите луѓе!
16
Радувајте се секогаш,
17
молете се постојано,
18
во сѐ благодарете, зашто тоа е Божјата волја за вас во Христос Исус.
19
Не гаснете го Духот.
20
Не презирајте ги пророштвата,
21
туку испитувајте сѐ и држете се за доброто.
22
Воздржувајте се од секој вид зло.
23
А Самиот Бог на мирот да ве освети целосно; и вашиот дух, душа и тело во целост да бидат запазени беспрекорни при доаѓањето на нашиот Господ Исус Христос.
24
Верен е Оној Кој ве повикува; Тој и ќе го изврши тоа.
25
Браќа, молете се за нас!
26
Поздравете ги сите браќа со свет бакнеж!
27
Ве заколнувам во Господ ова послание да им го прочитате на сите браќа.
28
Благодатта на нашиот Господ Исус Христос да биде со вас!