1 Тимотеј

Павле, апостол на Христос Исус по заповедта на Бог, нашиот Спасител, и на Христос Исус, нашата надеж,

до Тимотеј, моето вистинско дете во верата: благодат, милост и мир од Бог Таткото и од Христос Исус, нашиот Господ.

Како што те замолив да останеш во Ефес кога заминував за Македонија, за да им заповедаш на некои да не поучуваат поинакво учење,

и да не се занимаваат со измислици и бескрајни списоци на предци, кои предизвикуваат расправии наместо да го унапредуваат Божјиот план што се остварува преку вера.

А целта на заповедта е: љубов од чисто срце, добра совест и нелицемерна вера.

Некои се оддалечија од тоа и се свртеа кон празни разговори.

Тие сакаат да бидат учители на Законот, а не разбираат ниту што зборуваат ниту што толку самоуверено тврдат.

А ние знаеме дека Законот е добар, ако некој го употребува правилно,

знаејќи дека Законот не е даден за праведникот, туку за беззакониците и непокорните, за безбожниците и грешниците, за несветите и осквернетите, за оние што убиваат татко или мајка, за убијците,

за блудниците, мажите што легнуваат со мажи, трговците со луѓе, лажливците, оние што лажно се колнат и за сѐ друго што му се противи на здравото учење,

според Евангелието на славата на блажениот Бог, кое ми е доверено.

Му благодарам на Христос Исус, нашиот Господ, Кој ми даде сила, ме сметаше за верен и ме постави во служба,

мене, кој порано бев хулител, гонител и насилник; но ме помилува, бидејќи постапував во незнаење и неверие.

А благодатта на нашиот Господ се излеа во изобилство, заедно со верата и љубовта што се во Христос Исус.

Веродостоен е зборот и достоен за целосно прифаќање: Христос Исус дојде во светот да ги спаси грешниците, меѓу кои сум прв јас.

Па затоа бев и помилуван, за Христос Исус најнапред во мене да ја покаже сета Своја трпеливост, како пример на оние кои ќе поверуваат во Него за вечен живот.

А на Царот на вековите, Нераспадливиот, Невидливиот, Единствениот Бог, нека Му бидат чест и слава во вечни векови. Амин.

Тимотеј, дете мое, оваа заповед ти ја доверувам според пророштвата што порано беа изговорени за тебе, за, воден од нив, да ја водиш добрата борба,

имајќи вера и добра совест, која некои ја отфрлија и претрпеа бродолом во верата;

Меѓу нив се Именеј и Александар, кои ги предадов на сатаната за да научат да не хулат.