1 Тимотеј

Затоа, пред сѐ, поттикнувам да се упатуваат молби, молитви, застапувања и благодарности за сите луѓе,

за царевите и за сите што се на власт, за да живееме тивок и мирен живот во сета побожност и достоинство.

Тоа е добро и угодно пред Бог, нашиот Спасител,

Кој сака сите луѓе да се спасат и да ја познаат вистината.

Зашто еден е Бог и еден е Посредникот меѓу Бог и луѓето – Човекот Христос Исус,

Кој се даде Себеси како откуп за сите – сведоштво дадено во определеното време.

За тоа сум поставен за проповедник и апостол – ја кажувам вистината, не лажам – и учител на незнабожците во верата и вистината.

И така, сакам мажите да се молат на секое место, кревајќи свети раце без гнев и расправии.

Исто така, жените нека се украсуваат со пристојна облека, скромно и разумно, не со плетенки, злато, бисери или скапа облека,

туку со добри дела, како што им прилега на жени што исповедаат побожност.

Жената да се учи во тишина и целосно покорство.

Не ѝ дозволувам на жената да поучува ниту да има власт над мажот, туку да биде тивка.

Зашто прво беше создаден Адам, а потоа Ева;

и Адам не беше измамен, туку жената беше измамена и направи престап.

Но жената ќе биде спасена преку раѓањето деца, ако жените останат во верата, љубовта и светоста, со разумност.