1 Тимотеј

Глава 3

1
Веродостоен е зборот: ако некој се стреми кон служба на надгледувач, посакува благородно дело.
2
Затоа надгледувачот треба да биде беспрекорен, маж на една жена, трезвен, разумен, пристоен, гостољубив и способен да поучува;
3
да не биде пијаница или насилен, туку благ, мирољубив и да не ги сака парите;
4
добро да управува со својот дом и да ги држи своите деца во послушност, со целосно достоинство;
5
зашто, ако некој не знае да управува со својот дом, како ќе се грижи за Божјата црква?
6
Да не биде новообратен, за да не се возгордее и да падне под истата осуда како ѓаволот.
7
Треба да има и добро сведоштво од луѓето надвор од црквата, за да не падне во срам и во стапицата на ѓаволот.
8
И ѓаконите треба да бидат чесни, да не зборуваат дволично, да не се предаваат на многу вино и да не бидат алчни за нечесна печалба,
9
да ја пазат тајната на верата со чиста совест.
10
И тие најнапред нека бидат испитани, па ако се беспрекорни, нека служат како ѓакони.
11
Исто така, жените нека бидат чесни, да не клеветат, туку да бидат трезвени и верни во сѐ.
12
Секој од ѓаконите треба да биде маж на една жена, добро да управува со своите деца и својот дом.
13
Зашто оние што добро служеле стекнуваат добра положба и голема смелост во верата што е во Христос Исус.
14
Ова ти го пишувам со надеж дека наскоро ќе дојдам кај тебе.
15
Но ако се забавам, да знаеш како треба да се однесува човек во Божјиот дом, кој е црквата на живиот Бог, столб и потпора на вистината.
16
И, без сомнение, голема е тајната на побожноста: Тој се јави во тело, беше оправдан во Духот, им се јави на ангелите, беше проповедан меѓу народите, во светот поверуваа во Него и беше вознесен во слава.