1 Тимотеј

А Духот јасно зборува дека во подоцнежните времиња некои ќе отстапат од верата, слушајќи измамливи духови и ѓаволски учења,

преку лицемерието на лажливци, чија совест е жигосана.

Тие забрануваат склучување брак и бараат луѓето да се воздржуваат од храна што Бог ја создал со благодарност да ја примаат оние што веруваат и ја познаваат вистината.

Зашто секое Божјо создание е добро и ништо не треба да се отфрла кога се прима со благодарност,

бидејќи се осветува преку Божјиот Збор и молитвата.

Ако ги поучуваш браќата за ова, ќе бидеш добар служител на Христос Исус, хранејќи се со зборовите на верата и на доброто учење што верно го следиш.

Одбегнувај ги безбожните бабини приказни, а вежбај се во побожност;

зашто телесното вежбање има мала корист, а побожноста е корисна за сѐ, бидејќи има ветување и за сегашниот и за идниот живот.

Веродостоен е зборот и достоен за целосно прифаќање.

Затоа се трудиме и се бориме, бидејќи се надеваме на живиот Бог, Кој е Спасител на сите луѓе, особено на верниците.

Ова заповедај им го на верниците и поучувај ги за тоа!

Никој да не ја презира твојата младост, туку биди им пример на верниците во говорот, однесувањето, љубовта, верата и чистотата.

Додека да дојдам, посветувај се на јавното читање на Писмото, на поттикнувањето и поучувањето.

Не занемарувај го дарот што е во тебе, кој ти беше даден преку пророштво, со полагањето на рацете од старешините.

Посвети им се на овие работи и биди целосно предаден на нив, за твојот напредок да им биде видлив на сите.

Внимавај на себе и на учењето; остани посветен на тоа, зашто ако постапуваш така, ќе се спасиш и себеси и оние што те слушаат.