2 Летописи

Ровоам отиде во Шехем, зашто целиот Израел дојде во Шехем за да го постави за цар.

Кога Јеровоам, Наватовиот син, го слушна тоа – тој беше во Египет, каде што избега од царот Соломон – се врати од Египет.

Го повикаа, па Јеровоам и целиот Израел дојдоа кај Ровоам и му рекоа:

„Твојот татко го направи тежок нашиот јарем. Затоа сега олесни ја тешката служба на твојот татко и тешкиот јарем што ни го стави, па ќе ти служиме.“

Тој им рече: „Вратете се кај мене по три дена.“ И народот си отиде.

Царот Ровоам се посоветува со старешините што му служеа на неговиот татко Соломон додека беше жив. Ги праша: „Каков совет ми давате? Што да му одговорам на овој народ?“

Тие му одговорија: „Ако бидеш добар кон овој народ, ако им угодиш и им одговориш со љубезни зборови, тие ќе ти бидат слуги засекогаш.“

Но тој го отфрли советот што му го дадоа старешините и се посоветува со младите луѓе што пораснаа со него и му служеа.

Ги праша: „Каков совет ми давате? Што да му одговориме на овој народ, кој ми рече: ‚Олесни го јаремот што ни го стави твојот татко‘?“

Младите луѓе што пораснаа со него му рекоа: „Вака кажи му на народот што ти рече: ‚Твојот татко го направи тежок нашиот јарем, а ти олесни ни го.‘ Вака кажи им: ‚Мојот мал прст е подебел од половината на мојот татко.

Мојот татко ви стави тежок јарем, а јас ќе го направам уште потежок. Мојот татко ве казнуваше со камшици, а јас ќе ве казнувам со скорпии.‘“

На третиот ден Јеровоам и целиот народ дојдоа кај Ровоам, како што им рече царот: „Вратете се кај мене на третиот ден.“

Царот им одговори остро. Царот Ровоам го отфрли советот на старешините

и им зборуваше според советот на младите: „Мојот татко ви стави тежок јарем, а јас ќе го направам уште потежок. Мојот татко ве казнуваше со камшици, а јас ќе ве казнувам со скорпии.“

Така царот не го послуша народот, зашто тоа беше од Бог, за да го исполни зборот што Господ му го кажа на Јеровоам, Наватовиот син, преку Шилонецот Ахија.

Кога целиот Израел виде дека царот не ги послуша, народот му одговори на царот: „Каков дел имаме ние со Давид? Немаме наследство со Јесеевиот син! Израеле, секој во својот шатор! А сега, Давиде, грижи се за својот дом!“ Така целиот Израел си отиде во своите шатори.

Но над Израелевите синови што живееја во Јудините градови царуваше Ровоам.

Потоа царот Ровоам го испрати Адонирам, кој беше над задолжителните работници, но Израелевите синови го каменуваа и тој умре. Царот Ровоам едвај успеа да се качи во својата бојна кола и да избега во Ерусалим.

Така Израел се побуни против Давидовиот дом и остана така до денес.