2 Летописи

Наместо Аса се зацари неговиот син Јосафат, кој ја зацврсти својата власт против Израел.

Постави воени сили во сите утврдени Јудини градови и гарнизони во Јудината земја и во Ефремовите градови што ги освои неговиот татко Аса.

Господ беше со Јосафат, зашто одеше по поранешните патишта на својот предок Давид и не ги бараше Вааловците.

Тој Го бараше Бог на својот татко и одеше според Неговите заповеди, а не според делата на Израел.

Затоа Господ го утврди царството во неговата рака. Целиот Јуда му носеше дарови на Јосафат, и тој имаше големо богатство и слава.

Неговото срце се охрабри на Господовите патишта, па ги отстрани од Јуда високите места и ашерите.

Во третата година од своето царување ги испрати своите водачи Венхаил, Авдија, Захарија, Натанаил и Михаја да поучуваат во Јудините градови.

Со нив ги испрати левитите Семаја, Натанија, Зевадија, Асаил, Семирамот, Јонатан, Адонија, Товија и Тов-Адонија, а со нив и свештениците Елисама и Јорам.

Тие поучуваа во Јуда, носејќи ја со себе Книгата на Господовиот закон. Ги обиколуваа сите Јудини градови и го поучуваа народот.

Господов страв ги обзеде сите царства во земјите околу Јуда, па не војуваа против Јосафат.

Некои од Филистејците му носеа на Јосафат дарови и сребро како данок, а Арапите му донесоа стада: седум илјади и седумстотини овни и седум илјади и седумстотини јарци.

Јосафат стануваше сѐ помоќен. Во Јуда изгради тврдини и градови за складишта.

Имаше големи залихи во Јудините градови, а во Ерусалим имаше храбри воини.

Ова е нивниот број според нивните татковски домови. Од Јуда, заповедници над илјада: заповедникот Адна, а со него триста илјади храбри воини;

по него заповедникот Јоанан, а со него двесте и осумдесет илјади;

по него Амасија, синот на Зихриј, кој доброволно Му се посвети на Господ, а со него двесте илјади храбри воини.

Од Венијамин: Елијада, храбар воин, а со него двесте илјади вооружени со лакови и штитови;

по него Јозавад, а со него сто и осумдесет илјади вооружени за војна.

Овие му служеа на царот, покрај оние што царот ги постави во утврдените градови низ цела Јуда.