2 Летописи

Јосафат почина и беше погребан со своите татковци во Давидовиот град, а наместо него се зацари неговиот син Јорам.

Јорам имаше браќа, Јосафатови синови: Азарија, Јехиил, Захарија, Азарија, Михаил и Сафатија. Сите тие беа синови на Израелевиот цар Јосафат.

Нивниот татко им даде многу дарови – сребро, злато, скапоцености и утврдени градови во Јуда – но царството му го даде на Јорам, зашто тој беше првороден.

Кога Јорам ја презеде власта над царството на својот татко и се зацврсти, ги уби со меч сите свои браќа, како и некои од Израелевите водачи.

Јорам имаше триесет и две години кога стана цар и царуваше осум години во Ерусалим.

Одеше по патот на Израелевите цареви, како што постапуваше Ахавовиот дом, зашто неговата жена беше Ахавова ќерка. Тој правеше зло во Господовите очи.

Сепак, Господ не сакаше да го уништи Давидовиот дом поради заветот што го склучи со Давид и поради ветувањето дека засекогаш ќе му даде светилник нему и на неговите потомци.

Во негово време Едом се побуни против власта на Јуда и си постави свој цар.

Тогаш Јорам тргна со своите заповедници и со сите бојни коли. Стана ноќе и ги порази Едомците што го беа опколиле него и заповедниците на бојните коли.

Но Едом остана независен од Јудината власт до денес. Во исто време се побуни и Ливна, зашто Јорам Го напушти Господ, Бог на своите татковци.

Тој изгради високи места по Јудините планини, ги наведе жителите на Ерусалим кон духовно неверство и го заведе Јуда.

Тогаш му пристигна писмо од пророкот Илија: „Вака вели Господ, Бог на твојот предок Давид: ‚Бидејќи не одеше по патиштата на својот татко Јосафат ниту по патиштата на јудејскиот цар Аса,

туку одеше по патот на Израелевите цареви, ги наведе Јуда и жителите на Ерусалим кон неверство, како што го правеше Ахавовиот дом, и ги уби своите браќа од домот на својот татко, кои беа подобри од тебе,

ете, Господ ќе го удри со тежок удар твојот народ, твоите синови, твоите жени и целиот твој имот.

А ти ќе заболиш од тешка болест на цревата, сѐ додека поради болеста, од ден на ден, не ти излезат цревата.‘“

Потоа Господ го разбуди против Јорам духот на Филистејците и на Арапите што живееја близу до Етиопјаните.

Тие тргнаа против Јуда, навлегоа во земјата и го однесоа целиот имот што го најдоа во царскиот дворец, како и неговите синови и жени. Не му остана ниеден син, освен најмладиот, Охозија.

По сето тоа Господ го удри со неизлечлива болест на цревата.

По извесно време, кога поминаа две години, поради болеста му излегоа цревата и умре во тешки маки. Неговиот народ не запали за него мириси како што правеше за неговите татковци.

Имаше триесет и две години кога стана цар и царуваше осум години во Ерусалим. Умре без некој да жали за него. Го погребаа во Давидовиот град, но не во царските гробници.