2 Летописи

Јоас имаше седум години кога стана цар и царуваше четириесет години во Ерусалим. Неговата мајка се викаше Сивија и беше од Вир-Савеја.

Јоас го правеше она што беше право во Господовите очи во текот на сите денови на свештеникот Јодај.

Јодај му зеде две жени, и му се родија синови и ќерки.

По некое време Јоас реши да го обнови Господовиот дом.

Ги собра свештениците и левитите и им рече: „Одете по Јудините градови и секоја година собирајте пари од целиот Израел за да се поправа домот на вашиот Бог. Побрзајте со работата.“ Но левитите не побрзаа.

Тогаш царот го повика првосвештеникот Јодај и му рече: „Зошто не побара од левитите да го соберат од Јуда и Ерусалим данокот што Господовиот слуга Мојсеј му го наложи на Израелевото собрание за Шаторот на сведоштвото?

Зашто безбожната Готолија и нејзините синови го ограбија Божјиот дом, а сите посветени предмети од Господовиот дом ги употребија за Вааловците.“

По царска заповед направија ковчег и го поставија надвор, кај портата на Господовиот дом.

Потоа објавија низ Јуда и Ерусалим народот да Му го донесува на Господ данокот што Божјиот слуга Мојсеј му го наложи на Израел во пустината.

Сите водачи и целиот народ се радуваа, донесуваа и ставаа во ковчегот додека не се наполни.

Секогаш кога левитите го носеа ковчегот кај царските службеници и ќе видеа дека има многу пари, доаѓаа царскиот писар и службеникот на првосвештеникот, го празнеа ковчегот, а потоа го враќаа на неговото место. Така правеа секојдневно и собраа многу пари.

Царот и Јодај им ги даваа парите на надзорниците на работата во Господовиот дом. Тие најмуваа каменоресци и дрводелци за да го обноват Господовиот дом, како и ковачи и мајстори за бронза за да го поправат.

Работниците работеа и обновувањето напредуваше во нивните раце. Го вратија Божјиот дом во неговата првобитна состојба и го зацврстија.

Кога завршија, ги донесоа преостанатите пари пред царот и Јодај. Од нив направија предмети за Господовиот дом – садови за служба и принесување жртви, кадилници и други златни и сребрени садови. Во Господовиот дом редовно принесуваа жртви паленици во текот на целиот живот на Јодај.

Јодај остаре и се насити од животот, па умре. Имаше сто и триесет години кога умре.

Го погребаа во Давидовиот град меѓу царевите, зашто направи добро во Израел, пред Бог и за Неговиот дом.

По смртта на Јодај, јудејските водачи дојдоа, му се поклонија на царот, и царот ги послуша.

Тие го напуштија домот на Господ, Бог на своите татковци, и им служеа на ашерите и идолите. Поради оваа нивна вина, гнев дојде врз Јуда и Ерусалим.

Сепак, Господ им испраќаше пророци за да ги вратат кај Него. Тие сведочеа против нив, но народот не ги слушаше.

Тогаш Божјиот Дух го облече Захарија, синот на свештеникот Јодај. Тој застана на повисоко место пред народот и им рече: „Вака вели Бог: ‚Зошто ги престапувате Господовите заповеди? Нема да успеете. Бидејќи вие Го напуштивте Господ, и Тој ве напушти вас.‘“

Но тие направија заговор против него и, по царска заповед, го каменуваа во дворот на Господовиот дом.

Царот Јоас не се сети на добрината што му ја покажа Захариевиот татко Јодај, туку го уби неговиот син. Додека умираше, Захарија рече: „Господ нека види и нека побара сметка.“

На крајот од годината сириската војска тргна против Јоас. Дојдоа во Јуда и Ерусалим, ги уништија сите народни водачи и целиот плен го испратија кај царот во Дамаск.

Иако сириската војска беше малобројна, Господ предаде во нејзините раце многу голема војска, зашто Јудејците Го напуштија Господ, Бог на своите татковци. Така Сиријците извршија пресуда над Јоас.

Кога Сиријците се повлекоа, оставајќи го тешко ранет, неговите слуги направија заговор против него поради крвта на синот на свештеникот Јодај. Го убија во неговата постела и тој умре. Го погребаа во Давидовиот град, но не во царските гробници.

Заговорниците против него беа Завад, синот на Амонката Симеата, и Јозавад, синот на Моавката Симрита.

За неговите синови, за многуте пророштва против него и за обновувањето на Божјиот дом е запишано во толкувањето на Книгата на царевите. Наместо него се зацари неговиот син Амасија.