2 Цареви

Во тие денови Езекија се разболе смртно. Пророкот Исаија, синот на Амос, дојде кај него и му рече: „Вака вели Господ: Среди ги работите во својот дом, зашто ќе умреш и нема да оздравиш.“

Тогаш Езекија го сврте лицето кон ѕидот и Му се помоли на Господ:

„Те молам, Господи, сети се како одев пред Тебе верно и со цело срце и го правев она што е добро во Твоите очи.“ И Езекија горко заплака.

Исаија уште не беше излегол од средниот двор кога до него дојде Господовиот збор:

„Врати се и кажи му на Езекија, водачот на Мојот народ: ‚Вака вели Господ, Бог на твојот предок Давид: Ја слушнав твојата молитва и ги видов твоите солзи. Еве, ќе те исцелам. На третиот ден ќе се искачиш во Господовиот дом.

Ќе додадам петнаесет години на твојот живот. Ќе те избавам тебе и овој град од раката на асирискиот цар и ќе го заштитам овој град поради Себе и поради Мојот слуга Давид.‘“

Потоа Исаија рече: „Донесете колач од смокви.“ Го донесоа, го ставија врз чирот и царот оздраве.

Езекија го праша Исаија: „Кој ќе биде знакот дека Господ ќе ме исцели и дека на третиот ден ќе се искачам во Господовиот дом?“

Исаија одговори: „Ова ќе ти биде знак од Господ дека ќе го исполни зборот што го кажа: дали сенката да се помести десет степени напред или да се врати десет степени назад?“

Езекија рече: „Лесно е сенката да се помести десет степени напред. Не, нека се врати десет степени назад.“

Тогаш пророкот Исаија Го повика Господ и Господ ја врати сенката десет степени назад по скалите на Ахаз, по кои веќе беше слегла.

Во тоа време вавилонскиот цар Веродах-Валадан, синот на Валадан, му испрати писма и дар на Езекија, зашто беше чул дека Езекија бил болен.

Езекија ги прими гласниците и им ја покажа целата ризница: среброто, златото, мирисите, скапоценото масло, оружарницата и сѐ што се наоѓаше во неговите ризници. Не остана ништо во неговиот дворец и во целото негово царство што Езекија не им го покажа.

Тогаш пророкот Исаија дојде кај царот Езекија и го праша: „Што рекоа овие луѓе и од каде дојдоа кај тебе?“ Езекија одговори: „Дојдоа од далечна земја, од Вавилон.“

Исаија праша: „Што видоа во твојот дворец?“ Езекија одговори: „Видоа сѐ што има во мојот дворец. Нема ништо во моите ризници што не им го покажав.“

Тогаш Исаија му рече на Езекија: „Слушни го Господовиот збор:

‚Еве, доаѓаат денови кога сѐ што е во твојот дворец и сѐ што твоите татковци собрале до денес ќе биде однесено во Вавилон. Ништо нема да остане, вели Господ.

И некои од твоите синови што ќе произлезат од тебе и што ќе ти се родат ќе бидат одведени и ќе станат дворјани во палатата на вавилонскиот цар.‘“

Езекија му рече на Исаија: „Добар е Господовиот збор што го кажа.“ Зашто си мислеше: „Зар нема да има мир и сигурност во текот на мојот живот?“

Останатите дела на Езекија, сите негови јуначки дела, како го направи рибникот и водоводот и ја доведе водата во градот, се запишани во Книгата на летописите на јудејските цареви.

Езекија почина, а по него се зацари неговиот син Манасија.