2 Петар

Мили мои, ова е веќе второто писмо што ви го пишувам. Во двете преку потсетување го поттикнувам вашиот чист разум,

за да се потсетите на зборовите што однапред ги кажаа светите пророци и на заповедта на Господ и Спасителот, предадена преку вашите апостоли.

Пред сѐ, знајте го ова: во последните денови ќе дојдат подбивачи, кои ќе се подбиваат и ќе одат по своите желби,

велејќи: „Каде е ветувањето за Неговото доаѓање? Зашто откако починаа (грч. заспаа) татковците, сѐ останува како што било од почетокот на создавањето.“

Зашто тие намерно го превидуваат тоа дека небесата постоеле од дамнина, а земјата била создадена од вода и преку вода, со Божјиот Збор,

со тие води тогашниот свет беше потопен, и така беше уништен.

А сегашните небеса и земјата, со истиот Збор, се чуваат за оган до денот на судот и погибелта на безбожните луѓе.

Но едно не смее да ви биде непознато, мили мои: дека за Господ еден ден е како илјада години, и илјада години се како еден ден.

Господ не доцни со исполнувањето на ветувањето, како што мислат некои, туку е трпелив кон вас, зашто не сака некој да загине, туку сите да дојдат до покајание.

А Господовиот ден ќе дојде како крадец. Тогаш небесата ќе поминат со силна бучава, елементите ќе се распаднат во оган, а земјата и делата на неа нема да се најдат.

Бидејќи сето ова ќе се распадне, какви треба да бидете во свето поведение и побожност,

додека го очекувате и го забрзувате доаѓањето на Божјиот ден, поради кој небесата ќе се распаднат во оган, а основните елементи ќе се стопат од силна жештина?

А ние, според Неговото ветување, очекуваме нови небеса и нова земја, во кои живее праведноста.

Затоа, мили мои, бидејќи го очекувате ова, погрижете се Тој да ве најде во мир, неизвалкани и непорочни.

А трпеливоста на нашиот Господ сметајте ја како спасение, како што и нашиот сакан брат Павле ви напиша, според мудроста што му е дадена;

Како што и во сите свои посланија зборува за ова. Во нив има некои тешко разбирливи нешта, кои неуките и незацврстените ги изопачуваат, како и другите Писма, на своја погибел.

И така, вие, мили мои, кога го знаете ова однапред, пазете се заблудата на беззакониците да не ве повлече со себе и да не отпаднете од својата непоколебливост,

туку растете во благодатта и во познавањето на нашиот Господ и Спасител Исус Христос. Нему слава и сега и до Денот на вечноста! ⟦Амин.⟧