Прескокни кон главната содржина
Црква Евангелие Христово - Битола

2 Самоил

Глава 4

  1. 1

    Кога Исвостеј, Сауловиот син, слушна дека Авенир умрел во Хеврон, неговите раце ослабеа, а целиот Израел се вознемири.

  2. 2

    Исвостеј имаше двајца заповедници на чети. Едниот се викаше Ваана, а другиот Рихав. Тие беа синови на Римон од Вирот, од Венијаминовото племе, зашто и Вирот му припаѓаше на Венијамин.

  3. 3

    Виротците беа избегале во Гитаим и таму живеат како доселеници до денес.

  4. 4

    Јонатан, Сауловиот син, имаше син што беше сакат во нозете. Имаше пет години кога од Језраел дојде веста за Саул и Јонатан. Неговата негувателка го зеде и побегна, но додека брзаше да избега, тој падна и остана сакат. Неговото име беше Мефивостеј.

  5. 5

    Рихав и Ваана, синовите на Римон од Вирот, тргнаа и во најжешкиот дел од денот влегоа во куќата на Исвостеј, додека тој лежеше на својата постела напладне.

  6. 6

    Тие влегоа до средината на куќата, како да земаат жито, и го удрија во стомакот. Потоа Рихав и неговиот брат Ваана избегаа.

  7. 7

    Кога влегоа во куќата, Исвостеј лежеше на постелата во својата спална соба. Го удрија, го убија и му ја отсекоа главата. Потоа ја зедоа неговата глава и одеа цела ноќ по патот низ Арава.

  8. 8

    Ја донесоа главата на Исвостеј кај Давид во Хеврон и му рекоа на царот: „Еве ја главата на Исвостеј, синот на твојот непријател Саул, кој го бараше твојот живот. Денес Господ му се одмазди на Саул и на неговото потомство за мојот господар, царот.“

  9. 9

    Но Давид им одговори на Рихав и на неговиот брат Ваана, синовите на Римон од Вирот: „Како што е жив Господ, Кој ја избави мојата душа од секоја неволја,

  10. 10

    кога еден човек ми рече: ‚Ете, Саул умре‘, и мислеше дека ми носи добра вест, го фатив и го убив во Сиклаг. Тоа беше наградата што му ја дадов за неговата вест.

  11. 11

    Колку повеќе сега, кога злобни луѓе убиле праведен човек во неговата куќа, на неговата постела! Зар нема да ја побарам неговата крв од вашите раце и да ве истребам од земјата?“

  12. 12

    Тогаш Давид им заповеда на своите млади луѓе, и тие ги убија. Им ги отсекоа рацете и нозете и ги обесија кај водоемот во Хеврон. А главата на Исвостеј ја зедоа и ја погребаа во гробот на Авенир во Хеврон.