2 Самоил

Тогаш сите Израелеви племиња дојдоа кај Давид во Хеврон и му рекоа: „Ете, ние сме твоја коска и твое тело.

И порано, додека Саул царуваше над нас, ти беше оној што го водеше Израел во битките. Господ ти рече: ‚Ти ќе го пасеш Мојот народ Израел и ќе бидеш водач над Израел.‘“

Така сите Израелеви старешини дојдоа кај царот во Хеврон. Царот Давид склучи завет со нив пред Господ во Хеврон, и тие го помазаа Давид за цар над Израел.

Давид имаше триесет години кога стана цар и царуваше четириесет години.

Во Хеврон царуваше над Јуда седум години и шест месеци, а во Ерусалим царуваше над целиот Израел и Јуда триесет и три години.

Царот и неговите мажи отидоа во Ерусалим против Јевусејците, жителите на земјата. Тие му рекоа на Давид: „Нема да влезеш тука; и слепите и сакатите ќе те одбијат.“ Мислеа дека Давид не може да влезе во градот.

Но Давид ја освои тврдината Сион, која стана Давидовиот град.

Тој ден Давид рече: „Кој ќе ги порази Јевусејците, нека стигне преку водниот канал до сакатите и слепите, кои ѝ се омразни на Давидовата душа.“ Затоа се вели: „Слеп и сакат нема да влезе во домот.“

Давид се насели во тврдината и ја нарече Давидов град. Тој градеше наоколу, од Мило навнатре.

Давид стануваше сѐ посилен, а Господ, Бог над војските, беше со него.

Хирам, царот на Тир, испрати гласници кај Давид, заедно со кедрово дрво, дрводелци и каменоресци, и тие му изградија дворец на Давид.

Тогаш Давид разбра дека Господ го утврдил за цар над Израел и дека го возвишил неговото царство заради Својот народ Израел.

Откако дојде од Хеврон, Давид зеде уште наложници и жени од Ерусалим, и му се родија уште синови и ќерки.

Ова се имињата на оние што му се родија во Ерусалим: Самуа, Совав, Натан, Соломон,

Јевар, Елисуа, Нефег, Јафија,

Елисама, Елијада и Елифалет.

Кога Филистејците слушнаа дека Давид бил помазан за цар над Израел, сите Филистејци тргнаа да го бараат. Кога слушна за тоа, Давид слезе во тврдината.

Филистејците дојдоа и се раширија по долината Рафаим.

Тогаш Давид Го праша Господ: „Да тргнам ли против Филистејците? Ќе ги предадеш ли во мојата рака?“ Господ му одговори: „Тргни, зашто сигурно ќе ги предадам Филистејците во твојата рака.“

Давид дојде во Ваал-Ферасим и таму ги порази. Тој рече: „Господ ги проби моите непријатели пред мене како што водата пробива брана.“ Затоа тоа место беше наречено Ваал-Ферасим, односно Место на пробивите.

Филистејците ги оставија таму своите идоли, а Давид и неговите мажи ги однесоа.

Филистејците повторно дојдоа и се раширија по долината Рафаим.

Давид повторно Го праша Господ, а Тој му рече: „Не оди право против нив. Заобиколи ги одзади и нападни ги спроти црниците.

Кога ќе чуеш шум како чекорење по врвовите на црниците, тргни брзо, зашто тогаш Господ ќе излезе пред тебе за да ја порази филистејската војска.“

Давид направи како што му заповеда Господ и ги поразуваше Филистејците од Гава сѐ до влезот во Гезер.