2 Тимотеј

Глава 4

1
Сериозно ти наложувам пред Бог и пред Христос Исус, Кој ќе им суди на живите и на мртвите, и при Неговото појавување и Неговото царство:
2
проповедај го Зборот; биди подготвен во погодно и во непогодно време; изобличувај, укорувај и поттикнувај со сета трпеливост и поучување.
3
Зашто ќе дојде време кога луѓето нема да го поднесуваат здравото учење, туку според своите желби ќе си насоберат учители што ќе им го скокоткаат слухот;
4
ќе го одвратат слухот од вистината и ќе се свртат кон измислици.
5
Но ти биди трезвен во сѐ, поднесувај страдања, врши го делото на евангелист и целосно исполни ја својата служба.
6
Зашто јас веќе се излевам како жртвен принос и времето на моето заминување е близу.
7
Се борев во добрата борба, ја завршив трката, ја запазив верата.
8
Отсега ми е подготвен венецот на праведноста, кој во оној ден ќе ми го даде Господ, праведниот Судија – и не само мене, туку и на сите што го засакаа Неговото појавување.
9
Погрижи се да дојдеш кај мене што поскоро.
10
Зашто Димас ме остави, бидејќи го засака сегашниот век, и отиде во Солун; Крискес отиде во Галатија, а Тит во Далмација.
11
Само Лука е со мене. Земи го Марко и доведи го со себе, зашто ми е корисен за службата.
12
А Тихик го пратив во Ефес.
13
Кога ќе дојдеш, донеси ја наметката што ја оставив кај Карп во Троада, како и книгите, а особено пергаментите.
14
Ковачот Александар ми направи многу зло. Господ ќе му возврати според неговите дела.
15
Пази се и ти од него, зашто силно им се спротивстави на нашите зборови.
16
При мојата прва одбрана никој не застана на моја страна, туку сите ме оставија. Нека не им се земе тоа за грев.
17
Но Господ беше со мене и ме зајакна, за преку мене проповедта да биде целосно објавена и да ја чујат сите народи. И бев избавен од устата на лавот.
18
Господ ќе ме избави од секое зло дело и безбедно ќе ме воведе во Своето небесно царство. Нему нека Му е слава во вечни векови. Амин.
19
Поздрави ги Прискила и Акила и домот на Онисифор.
20
Ераст остана во Коринт. А Трофим го оставив болен во Милет.
21
Побрзај да дојдеш пред зимата! Те поздравуваат Евул, Пуд, Лин, Клаудија и сите браќа.
22
Господ нека биде со твојот дух. Благодатта нека биде со вас.