Дела на апостолите

Во Цезареја имаше еден човек по име Корнелиј, стотник во таканаречениот Италијански полк.

Тој и целиот негов дом беа побожни и богобојазливи; многу им помагаше на сиромашните меѓу народот и постојано Му се молеше на Бог.

Околу деветтиот час на денот, виде јасно во видение Божји ангел, како доаѓа при него и му вели: „Корнелиј!“

Корнелиј се загледа во него и со страв праша: „Што е, Господи?“ Ангелот му одговори: „Твоите молитви и твојата помош за сиромашните се вознесоа пред Бог како спомен за тебе.

А сега, испрати луѓе во Јопа и повикај го Симон, наречен Петар.

Тој престојува кај некој кожар, Симон, чија куќа е крај морето.“

И кога си отиде ангелот кој му зборуваше, викна двајца свои слуги и еден побожен војник, од оние кои беа постојано покрај него,

и откако им кажа сѐ, ги испрати во Јопа.

А утредента, додека тие патуваа и се приближуваа до градот, Петар излезе околу шестиот час и се качи на покривот од куќата за да се помоли.

Огладне и посака да јаде; и додека му приготвуваа јадење, тој падна во занес

и виде отворено небо и нешто како големо платно, врзано за четирите краишта, кое се спушташе на земјата.

Во него беа сите четириножни животни, диви ѕверови, земни лазачи и небесни птици.

И еден глас му рече: „Стани, Петре, заколи и јади!“

А Петар рече: „Никако, Господи! Никогаш не сум јадел нешто осквернето или нечисто.“

Гласот повторно му рече: „Она што Бог го очистил, ти не го нарекувај нечисто!“

Тоа се случи трипати, и платното пак се крена на небо.

И додека Петар беше во недоумение, што би можело да значи видението што го виде, ете, луѓето испратени од Корнелиј, стоеја пред тремот, се распрашуваа за куќата на Симон,

па прашаа: „Дали тука престојува Симон, наречен Петар?“

И додека Петар уште размислуваше за видението, Духот му рече: „Еве, те бараат тројца мажи;

стани, слези долу и оди со нив без никакво двоумење, зашто Јас ги пратив!“

Тогаш Петар слезе кај луѓето и рече: „Еве, јас сум оној што го барате. Зошто дојдовте?“

А тие рекоа: „Стотникот Корнелиј – човек праведен и богобојазлив, за кого добро сведочи целиот еврејски народ, прими заповед од свет ангел да те повика во својот дом и да ги чуе твоите зборови.“

Тогаш ги повика внатре и ги угости. А утредента стана и отиде со нив, а некои браќа од Јопа го придружија.

Следниот ден пристигнаа во Цезареја, а Корнелиј ги очекуваше, и ги беше повикал своите роднини и блиски пријатели.

А кога Петар влегуваше, Корнелиј го пречека, падна пред неговите нозе и се поклони.

Петар го подигна, велејќи: „Стани! И јас сум само човек!“

Така разговарајќи со него, влезе и најде мнозина собрани,

на кои им рече: „Вие знаете дека на Евреин не му е дозволено да се дружи со човек туѓинец и да доаѓа кај него. Но мене Бог ми покажа дека никого не треба да нарекувам поган или нечист.

Затоа дојдов без противење кога ме повикавте, па ве прашувам – која е причината што ме викнавте?“

И Корнелиј рече: „Пред четири дена, токму во овој час, во деветтиот час, се молев во својот дом; и ете, пред мене застана човек во светла облека

и рече: ‚Корнелиј, твојата молитва е чуена, а твоите милостини се спомнати пред Бог.

Затоа, испрати некого во Јопа и повикај го Симон, наречен Петар! Тој престојува во куќата на Симон, кожарот, крај морето.‘

Затоа веднаш испратив по тебе, а ти добро направи што дојде. Сега сите сме овде пред Бог, за да чуеме сѐ што Господ ти заповедал.“

Тогаш Петар почна да зборува: „Навистина разбирам дека Бог не е пристрасен,

туку во секој народ Му е мил оној што има страхопочит кон Него и кој постапува праведно.

Вие ја знаете пораката што Бог им ја испрати на Израелевите синови, навестувајќи го Евангелието на мирот преку Исус Христос – Тој е Господ на сите.

Самите знаете што се случи по сета Јудеја, почнувајќи од Галилеја, по крштавањето што го проповедаше Јован;

Знаете како Бог Го помаза Исус од Назарет со Светиот Дух и со сила. Тој одеше насекаде, правејќи добро и исцелувајќи ги сите што ѓаволот ги измачуваше, зашто Бог беше со Него.

А ние сме сведоци за сѐ што направи во јудејската земја и во Ерусалим; Го убија обесувајќи Го на дрво.

Него Бог Го воскресна на третиот ден и Му даде да се покаже,

но не на сите луѓе, туку на однапред од Бог избраните сведоци – нам, коишто јадевме и пиевме со Него откако воскресна од мртвите.

Тој ни заповеда да му навестиме на народот и смело да сведочиме дека Тој е Оној Кого Бог Го определи за Судија на живите и мртвите.

Сите пророци сведочат за Него дека секој што верува во Него добива проштавање на гревовите преку Неговото име.“

Додека Петар сѐ уште ги зборуваше овие зборови, Светиот Дух слезе на сите што го слушаа говорот

и се зачудија обрежаните верници кои дојдоа со Петар дека и на незнабожците се излеа дарот на Светиот Дух;

зашто ги чуја како зборуваат на други јазици и Го величаат Бог. Тогаш Петар рече:

„Може ли некој да спречи да се крстат со вода овие луѓе, кои Го примија Светиот Дух како и ние?“

И им заповеда да се крстат во името на Исус Христос. Тогаш го замолија да остане уште неколку денови.