Дела на апостолите

Петар и Јован одеа кон храмот во деветтиот час, времето за молитва.

Тогаш донесоа еден човек, кој не можеше да оди уште од раѓањето. Секој ден го поставуваа пред храмската порта наречена Красна, за да проси од оние што влегуваа во храмот.

Кога ги виде Петар и Јован како влегуваат во храмот, ги замоли да му дадат нешто.

А Петар, заедно со Јован, се загледа во него и му рече: „Погледај нѐ!“

А тој обрна внимание на нив, очекувајќи да добие нешто.

Но Петар му рече: „Немам ни сребро ни злато, а што имам, тоа ти давам: во името на Исус Христос Назареќанецот, оди!“

Тогаш го фати за десната рака и го подигна; и веднаш му зајакнаа стапалата и глуждовите,

скокна, се исправи и прооде; и влезе со нив во храмот, скокајќи и фалејќи Го Бог.

Така, целиот народ го виде како оди и како Го фали Бог.

Го препознаа дека тој беше човекот што седеше и просеше пред Красната Порта на храмот, па се исполнија со восхит и чудење поради она што му се случи.

Бидејќи тој не се одделуваше од Петар и Јован, восхитениот народ се собра околу нив во тремот наречен Соломонов.

А кога Петар го виде тоа, му се обрати на народот: „Мажи Израелци, зошто се чудите на ова или зошто гледате на нас, како да ние со своја сила или побожност направивме овој човек да прооди?

Бог на Авраам, Исак и Јаков, Бог на нашите татковци, Го прослави Својот Слуга Исус, Кого вие Го предадовте и од Кого се откажавте пред Пилат, кога тој реши да Го ослободи.

Вие се откажавте од Светецот и Праведникот, и молевте да ви биде ослободен еден убиец,

а Го убивте Творецот на животот, Кого Бог Го воскресна од мртвите, за што ние сме сведоци.

И врз основа на верата во Неговото име, самото Негово име го зацврсти овој човек, кого го гледате и познавате. Верата што доаѓа преку Него му даде целосно здравје пред сите вас.

А сега, браќа, знам дека вие, како и вашите поглавари, го направивте тоа од незнаење.

Но, Бог на тој начин го исполни тоа што го навестуваше однапред преку устата на сите пророци: дека Неговиот Христос ќе пострада.

Затоа, покајте се и обратете се, за да ви бидат избришани гревовите, та од Господовото присуство да дојдат времиња на освежување,

и да Го испрати Христос, Кој однапред ви беше определен – Исус,

Кого небото треба да Го прими до времето кога ќе биде обновено сѐ, за кое Бог зборуваше од старо време преку устата на Своите свети пророци.

Зашто Мојсеј рече: ‚Господ Бог ќе ви издигне од вашите браќа Пророк како мене, бидете Му послушни во сѐ што ќе ви рече!

А секоја душа, која нема да Го послуша тој Пророк, ќе биде истребена од народот.‘

А и сите пророци од Самоил па натаму, кои зборуваа, ги навестуваа овие денови.

Вие сте синови на пророците и на Заветот што Бог го склучи со вашите татковци кога му рече на Авраам: ‚Во твоето Семе ќе бидат благословени сите племиња на земјата.‘

Бог првин вам ви Го подигна Својот Слуга и ви Го испрати за да ве благослови, за да го одврати секого од вас од вашите беззаконија.“