Амос

Го видов Господ како стои крај жртвеникот и рече: „Удри по капителите, за да се затресат праговите, и искрши ги врз главите на сите нив; а остатокот ќе го убијам со меч. Никој што бега нема да избега и никој што се обидува да се спаси нема да се избави.

И да прокопаат до Шеолот, оттаму Мојата рака ќе ги земе; и да се искачат на небото, оттаму ќе ги симнам.

И да се сокријат на врвот на Кармил, оттаму ќе ги побарам и ќе ги земам; и да се скријат од Моите очи на морското дно, таму ќе ѝ заповедам на змијата и таа ќе ги касне.

И да отидат во ропство пред своите непријатели, и таму ќе му заповедам на мечот да ги убие; ќе го насочам Својот поглед кон нив за зло, а не за добро.“

Зашто Господ, Бог над војските, ја допира земјата и таа се топи, и сите што живеат во неа тагуваат; целата се подигнува како Нил и се спушта како египетскиот Нил.

Тој ги гради Своите горни одаи на небесата и го поставува Својот свод над земјата; ги повикува морските води и ги излева по лицето на земјата — Господ е Неговото име.

„Зар не сте Ми како Кушијците, Израелеви синови?“ вели Господ. „Зар не го изведов Израел од египетската земја, Филистејците од Кафтор, а Арамејците од Кир?

Ете, очите на Господ Бог се врз грешното царство, и Јас ќе го истребам од лицето на земјата; но нема сосема да го истребам Јакововиот дом,“ вели Господ.

„Зашто, ете, Јас ќе заповедам и ќе го пресеам Израелевиот дом меѓу сите народи, како што се просејува жито во сито, но ниедно зрно нема да падне на земјата.

Од меч ќе умрат сите грешници меѓу Мојот народ, кои велат: „Нема да нѐ стигне ниту ќе нѐ пресретне злото.“

Во тој ден ќе го подигнам паднатиот Давидов шатор, ќе ги затворам неговите пукнатини, ќе ги подигнам неговите урнатини и повторно ќе го изградам како во древните денови.

За да го наследат остатокот од Едом и сите народи што се нарекуваат со Моето име,“ вели Господ, Кој го прави тоа.

„Ете, доаѓаат денови,“ вели Господ, „кога орачот ќе го стигнува жетварот, а оној што гази грозје — сејачот; планините ќе капат со шира (вино), а сите ридови ќе се растопуваат.

Ќе ја обновам благосостојбата на Мојот народ Израел; тие повторно ќе ги изградат опустошените градови и ќе живеат во нив, ќе насадат лозја и ќе пијат од нивното вино, ќе направат градини и ќе го јадат нивниот плод.

Ќе ги насадам во нивната земја и нема повеќе да бидат искоренети од земјата што им ја дадов,“ вели Господ, твојот Бог.