Колосјаните

Павле, по Божја волја апостол на Христос Исус, и братот Тимотеј,

до светите и верните браќа во Христос што се во Колоси: благодат и мир да имате од Бог, нашиот Татко.

Секогаш кога се молиме за вас, Му благодариме на Бог, Таткото на нашиот Господ Исус Христос,

зашто чувме за вашата вера во Христос Исус и за љубовта што ја имате кон сите свети,

поради надежта што е зачувана за вас на небесата. За неа порано чувте во зборот на вистината – Евангелието,

кое дојде кај вас, како и во целиот свет. Тоа принесува плод и расте, како што расте и меѓу вас од денот кога ја чувте и вистински ја познавте Божјата благодат.

За неа научивте од Епафрас, нашиот љубен сослужител, кој е верен Христов служител за вас

и кој нѐ извести за вашата љубов во Духот.

Затоа и ние, од денот кога го чувме тоа, не престануваме да се молиме за вас и да бараме да се исполните со познавање на Неговата волја, со сета духовна мудрост и разбирање,

за да живеете достојно за Господ и целосно да Му угодувате: да принесувате плод во секое добро дело и да растете во познавањето на Бог,

зајакнувани со секоја сила, според моќта на Неговата слава, за сета истрајност и трпеливост,

со радост благодарејќи Му на Таткото, Кој ве направи способни да учествувате во наследството на светите во светлината.

Тој нѐ избави од власта на темнината и нѐ пренесе во царството на Својот љубен Син,

во Кого имаме откуп и простување на гревовите.

Тој е образ на невидливиот Бог, Првороден над сето создание,

зашто во Него беше создадено сѐ на небесата и на земјата, видливо и невидливо – било престоли, господства, началства или власти. Сѐ е создадено преку Него и за Него.

Тој е пред сѐ и сѐ се одржува во Него.

Тој е Главата на телото, Црквата. Тој е Почетокот, Првородениот од мртвите, за да има првенство во сѐ.

Зашто на Бог Му беше угодно сета полнота да живее во Него

и преку Него да помири со Себе сѐ – било на земјата, било на небесата – воспоставувајќи мир преку крвта на Неговиот крст.

И вас, кои некогаш бевте отуѓени и непријатели во своите мисли поради злите дела,

сега ве помири во Неговото тело преку смртта, за да ве постави пред Себе свети, беспрекорни и без вина,

само ако останете цврсти и непоколебливи во верата и не се оддалечувате од надежта на Евангелието што го чувте. Тоа Евангелие е проповедано на секое создание под небото, а јас, Павле, станав негов слуга.

Сега се радувам во своите страдања за вас и во своето тело го дополнувам она што недостига од Христовите страдања за Неговото тело, кое е Црквата.

Нејзин слуга станав според службата што Бог ми ја довери за вас, за целосно да го објавам Божјиот збор,

односно тајната што беше скриена низ вековите и поколенијата, а сега им е откриена на Неговите свети.

На нив Бог сакаше да им покаже колкаво е богатството на славата на оваа тајна меѓу незнабожците: Христос во вас, надежта на славата.

Него Го проповедаме, предупредувајќи го секој човек и поучувајќи го секој човек со сета мудрост, за секого да го поставиме зрел во Христос.

За тоа се трудам и се борам според Неговото дејствување, кое моќно дејствува во мене.