5 Мојсеева — Второзаконие

„Во тоа време Господ ми рече: ‚Изделкај две камени плочи како првите и искачи се кај Мене на планината. Направи и дрвен ковчег.

Јас ќе ги напишам на плочите зборовите што беа на првите плочи, кои ти ги скрши, а ти стави ги во ковчегот.‘

Така направив ковчег од акациево дрво, изделкав две камени плочи како првите и се искачив на планината со двете плочи во рацете.

Господ ги напиша на плочите истите зборови што беа напишани порано – Десетте заповеди што Господ ви ги кажа на планината од огнот, во денот на собранието – и Господ ми ги даде.

Потоа се свртев, слегов од планината и ги ставив плочите во ковчегот што го направив. Тие останаа таму, како што ми заповеда Господ.

Потоа Израелевите синови тргнаа од Вирот-Бене-Јакан кон Мосера. Таму умре Арон и таму беше погребан, а неговиот син Елеазар стана свештеник наместо него.

Оттаму тргнаа кон Гудгода, а од Гудгода кон Јотвата, земја со многу водни потоци.

Во тоа време Господ го одвои Левиевото племе да го носи ковчегот на Господовиот завет, да стои пред Господ, да Му служи и да благословува во Неговото име, како што прави до денес.

Затоа Леви нема дел и наследство со своите браќа; Господ е неговото наследство, како што му рече Господ, твојот Бог.

Јас останав на планината како и првиот пат, четириесет дена и четириесет ноќи. Господ ме послуша и овој пат и не сакаше да те погуби.

Тогаш Господ ми рече: ‚Стани и поведи го народот, за да влезат и да ја наследат земјата за која им се заколнав на нивните татковци дека ќе им ја дадам.‘

А сега, Израеле, што бара од тебе Господ, твојот Бог, освен да се боиш од Господ, твојот Бог, да одиш по сите Негови патишта, да Го сакаш и да Му служиш на Господ, твојот Бог, со целото свое срце и со целата своја душа,

и да ги пазиш Господовите заповеди и одредби што денес ти ги давам за твое добро?

Еве, на Господ, твојот Бог, Му припаѓаат небото и највисокото небо, земјата и сѐ што е на неа.

Сепак, Господ ги засака само твоите татковци и го избра нивното потомство по нив – вас, меѓу сите народи – како што е денес.

Затоа обрежете ја необрежаноста на своето срце и не бидете повеќе тврдоглави.

Зашто Господ, вашиот Бог, е Бог над боговите и Господар над господарите, голем, силен и страшен Бог, Кој не гледа кој е кој и не прима поткуп.

Тој им дава правда на сирачето и вдовицата и го сака странецот, давајќи му храна и облека.

Затоа сакајте го странецот, зашто и вие бевте странци во Египетската земја.

Бој се од Господ, твојот Бог, Нему служи, држи се за Него и во Неговото име заколнувај се.

Тој е твојата пофалба и Тој е твојот Бог, Кој за тебе ги направи овие големи и страшни дела што ги видоа твоите очи.

Твоите татковци слегоа во Египет како седумдесет души, а сега Господ, твојот Бог, те направи многуброен како небесните ѕвезди.