5 Мојсеева — Второзаконие

Пази го месецот Авив и празнувај ја Пасхата на Господ, твојот Бог, зашто во месецот Авив Господ, твојот Бог, те изведе од Египет ноќе.

Принеси Му ја пасхалната жртва на Господ, твојот Бог, од ситниот или крупниот добиток, на местото што Господ ќе го избере за таму да го постави Своето име.

Не јади со неа ништо квасно. Седум дена јади бесквасен леб, леб на неволјата, зашто набрзина излезе од Египетската земја, за да го помниш денот кога излезе од Египетската земја во сите денови на својот живот.

Седум дена да не се гледа квас никаде во сите твои предели; и од месото што ќе го жртвуваш вечерта на првиот ден да не остане ништо до утрото.

Не смееш да ја принесуваш пасхалната жртва во кој било од градовите што ти ги дава Господ, твојот Бог,

туку на местото што Господ, твојот Бог, ќе го избере за таму да го постави Своето име. Таму принеси ја пасхалната жртва навечер, при зајдисонце, во времето кога излезе од Египет.

Испечи ја и јади ја на местото што Господ, твојот Бог, ќе го избере; а наутро врати се и оди во своите шатори.

Шест дена јади бесквасен леб, а седмиот ден одржи свечено собрание пред Господ, твојот Бог; тој ден не врши никаква работа.

Изброј си седум седмици. Почни да ги броиш седумте седмици од времето кога првпат ќе ставиш срп на житото.

Тогаш празнувај го Празникот на седмиците пред Господ, твојот Бог, и принеси доброволен принос од својата рака, според благословот што ти го дал Господ, твојот Бог.

Радувај се пред Господ, твојот Бог, ти, твојот син, твојата ќерка, твојот слуга, твојата слугинка, левитот што живее во твоите градови, странецот, сирачето и вдовицата што се меѓу вас, на местото што Господ, твојот Бог, ќе го избере за таму да го постави Своето име.

Спомни си дека и ти беше роб во Египет, па внимавај да ги извршуваш овие одредби.

Празнувај го Празникот на шаторите седум дена, откако ќе го собереш родот од своето гумно и од својата каца.

Радувај се на својот празник, ти, твојот син, твојата ќерка, твојот слуга, твојата слугинка, левитот, странецот, сирачето и вдовицата што живеат во твоите градови.

Седум дена празнувај Му на Господ, твојот Бог, на местото што Господ ќе го избере, зашто Господ, твојот Бог, ќе те благословува во целиот твој род и во сите дела на твоите раце, па ќе бидеш исполнет со радост.

Трипати во годината секое машко нека се појави пред Господ, твојот Бог, на местото што Тој ќе го избере: на Празникот на бесквасните лебови, на Празникот на седмиците и на Празникот на шаторите. Никој да не се појави пред Господ со празни раце.

Секој нека даде колку што може, според благословот што му го дал Господ, твојот Бог.

Постави си судии и надзорници во сите свои градови што Господ, твојот Бог, ти ги дава, по своите племиња; тие нека му судат на народот со праведен суд.

Не ја извртувај правдата, не гледај кој е кој и не примај поткуп, зашто поткупот ги заслепува очите на мудрите и ги извртува зборовите на праведните.

Следи ја правдата, само правдата, за да живееш и да ја наследиш земјата што Господ, твојот Бог, ти ја дава.

Не засадувај никакво дрво како ашера покрај жртвеникот на Господ, твојот Бог, што ќе го изградиш.

Не поставувај ни свет столб, зашто Господ, твојот Бог, го мрази тоа.