5 Мојсеева — Второзаконие

Ова е благословот со кој Божјиот човек Мојсеј ги благослови Израелевите синови пред својата смрт.

Тој рече: „Господ дојде од Синај и им се појави од Сеир. Заблеска од гората Фаран и дојде со десетици илјади свети. Од Неговата десна рака излезе огнен закон за нив.

Навистина, Тој ги сака народите; сите Негови свети се во Твојата рака. Тие седат при Твоите нозе и ги примаат Твоите зборови.

Мојсеј ни даде закон, наследство за Јакововото собрание.

Господ беше Цар во Јешурун, кога народните поглавари се собраа заедно со сите Израелеви племиња.

Нека живее Рувим и нека не умре; неговите луѓе нека не бидат малобројни.“

А за Јуда рече: „Господи, чуј го гласот на Јуда и врати го кај неговиот народ. Неговите раце нека бидат доволни за него, а Ти биди му помош против неговите непријатели.“

За Леви рече: „Твоите Тумим и Урим нека бидат кај Твојот верен човек, кого го испита кај Маса и со кого се расправаше кај водите на Мерива.

Тој рече за својот татко и за својата мајка: ‚Не гледам на нив‘; не ги призна своите браќа и не ги позна своите деца, зашто тие го чуваа Твојот збор и го пазеа Твојот завет.

Тие ќе го учат Јаков на Твоите закони и Израел на Твојот закон. Ќе ставаат темјан пред Тебе и жртви паленици на Твојот жртвеник.

Господи, благослови ја неговата сила и прими го делото на неговите раце. Скрши ги бедрата на оние што стануваат против него и на оние што го мразат, за повеќе да не станат.“

За Венијамин рече: „Господовиот сакан ќе живее безбедно покрај Него. Господ ќе го закрилува цел ден, а тој ќе почива меѓу Неговите рамена.“

За Јосиф рече: „Господ нека ја благослови неговата земја со скапоцени небесни дарови, со роса и со водите од бездната што лежи долу,

со најдобрите плодови што ги зрее сонцето и со скапоцените плодови што ги даваат месеците,

со најдоброто од древните планини и со скапоценостите од вечните ридови,

со скапоценостите на земјата и сѐ што ја исполнува, и со благонаклоноста на Оној Кој се појави во грмушката. Сето тоа нека дојде врз главата на Јосиф, врз темето на оној што беше одделен од своите браќа.

Неговата слава е како слава на првороден бик, а неговите рогови се како рогови на див вол. Со нив ќе ги боде народите до краиштата на земјата. Тоа се десетиците илјади на Ефрем и илјадниците на Манасија.“

За Завулон рече: „Радувај се, Завулоне, кога излегуваш, и ти, Исахаре, во своите шатори.

Ќе ги повикаат народите на гората и таму ќе принесуваат праведни жртви, зашто ќе го црпат изобилството на морето и богатствата скриени во песокот.“

За Гад рече: „Благословен да е Оној Кој ја проширува земјата на Гад! Тој живее како лавица и раскинува рака и глава.

Го избра за себе најдобриот дел, зашто таму му беше зачуван делот на водачот. Дојде со народните поглавари и ја изврши Господовата правда и Неговите пресуди со Израел.“

За Дан рече: „Дан е млад лав што скока од Васан.“

За Нефталим рече: „Нефталиме, наситен со благонаклоност и исполнет со Господовиот благослов, завладеј ги западот и југот.“

За Асир рече: „Асир нека биде поблагословен од другите синови; нека биде мил меѓу своите браќа и нека ја натопува својата нога во масло.

Твоите обувки нека бидат од железо и бакар, а твојата сила нека трае колку и твоите денови.

Нема никој како Бог на Јешурун, Кој се движи по небесата за да ти помогне и по облаците во Своето величество.

Вечниот Бог е твое засолниште, а под тебе се Неговите вечни раце. Тој ќе го истера непријателот пред тебе и ќе рече: ‚Уништи го!‘

Така Израел ќе живее безбедно и одделено; Јакововиот извор ќе биде во земја богата со жито и вино, а неговото небо ќе капе роса.

Блажен си, Израеле! Кој е како тебе, народ спасен од Господ? Тој е твој штит и твоја помош, мечот на твојата слава. Твоите непријатели ќе се понизат пред тебе, а ти ќе газиш по нивните височини.“