Проповедник

Доброто име е подобро од скапоцено миризливо масло, а денот на смртта е подобар од денот на раѓањето.

Подобро е да се оди во дом каде што има жалост отколку во дом каде што има гозба, зашто смртта е крајот на секој човек, а живиот треба да го земе тоа при срце.

Подобра е тагата од смеата, зашто и кога лицето е нажалено, срцето може да стане подобро.

Срцето на мудрите е во домот на жалоста, а срцето на безумните во домот на веселбата.

Подобро е да се слуша укорот на мудриот отколку песната на безумните.

Како што трњето пука под котелот, таква е смеата на безумниот. И тоа е празнина.

Угнетувањето може и мудриот да го направи безумен, а поткупот го расипува срцето.

Подобар е крајот на нешто отколку неговиот почеток; подобар е трпеливиот од горделивиот.

Не брзај да се разгневуваш, зашто гневот почива во срцето на безумните.

Не вели: „Зошто поранешните денови беа подобри од овие?“ Зашто не е мудро да прашуваш така.

Мудроста е добра заедно со наследството и им носи корист на оние што го гледаат сонцето.

Зашто мудроста дава заштита како што и парите даваат заштита, но предноста на знаењето е во тоа што мудроста го чува животот на оној што ја има.

Погледни го Божјото дело: кој може да го исправи она што Тој го направил криво?

Во добар ден радувај се на доброто, а во ден на неволја размисли: Бог го создал и едното и другото, за човекот да не може да знае што го чека по него.

Сѐ сум видел во деновите на својот празен живот: има праведен што пропаѓа и покрај својата праведност, а има безбожен што долго живее во своето зло.

Не биди претерано праведен и не сметај се себеси за премногу мудар. Зошто самиот да се доведеш до пропаст?

Не биди ни претерано безбожен, ниту биди глупав. Зошто да умреш пред своето време?

Добро е да се држиш до едното, а ни од другото да не ја тргаш раката, зашто оној што има страв од Бог ќе се избави од сето тоа.

Мудроста му дава на мудриот поголема сила отколку десет владетели во еден град.

Зашто нема праведен човек на земјата кој постојано прави добро и никогаш не греши.

Не обрнувај внимание на секој збор што луѓето го зборуваат, за да не го чуеш и својот слуга како те проколнува.

Зашто и самиот добро знаеш дека многупати и ти си проколнувал други.

Сето ова го испитав со мудрост. Си реков: „Ќе станам мудар“, но мудроста остана далеку од мене.

Она што постои е далечно и многу длабоко; кој може целосно да го открие?

Го насочив своето срце да сознае, да истражува и да бара мудрост и објаснување, и да разбере дека безбожноста е глупост, а глупоста — лудост.

И најдов нешто погорчливо од смртта: жената чие срце е како стапица и мрежа, а нејзините раце како окови. Оној што Му е угоден на Бог ќе се избави од неа, а грешникот ќе биде фатен во нејзината стапица.

„Еве што открив“, вели Проповедникот, „испитувајќи едно по едно за да дојдам до заклучок.“

Душата моја сѐ уште бараше, но не го најде она што го бараше: еден исправен човек меѓу илјада најдов, а жена меѓу сите нив не најдов.

Само ова го открив: Бог го создал човекот исправен, но луѓето тргнале по многу свои замисли.