2 Мојсеева — Излез

Господ му беше рекол на Мојсеј: „Ќе нанесам уште една неволја врз фараонот и врз Египет; потоа ќе ве пушти оттука. А кога ќе ве пушти, сосема ќе ве истера оттука.

Кажи му на народот: секој маж да побара од својот сосед, а секоја жена од својата сосетка, сребрени и златни предмети.“

Господ му даде на народот благонаклоност пред Египќаните. И самиот Мојсеј беше многу почитуван во Египетската земја, и пред фараоновите слуги и пред народот.

Тогаш Мојсеј рече: „Вака вели Господ: Околу полноќ ќе поминам низ Египет.

Секое првородено во Египетската земја ќе умре, од првородениот син на фараонот, кој седи на својот престол, до првородениот син на слугинката што работи кај рачната мелница, како и секое првородено од добитокот.

Низ целата Египетска земја ќе се крене голем писок, каков што никогаш немало и никогаш повеќе нема да има.

Но против ниеден од Израелевите синови, ниту против човек ниту против животно, ни куче нема да залае, за да знаете дека Господ прави разлика меѓу Египќаните и Израел.

Тогаш сите овие твои слуги ќе дојдат кај мене, ќе ми се поклонат и ќе речат: ‚Излези ти и сиот народ што те следи!‘ Потоа ќе излезам.“ И Мојсеј излезе од присуството на фараонот многу разгневен.

Господ му беше рекол на Мојсеј: „Фараонот нема да ве послуша, за да се умножат Моите чуда во Египетската земја.“

Мојсеј и Арон ги направија сите овие чуда пред фараонот, но Господ го закорави срцето на фараонот, и тој не ги пушти Израелевите синови од својата земја.