2 Мојсеева — Излез

Господ му рече на Мојсеј:

„Ете, го повикав по име Веселеил, син на Ури, син на Ор, од Јудиното племе.

Го исполнив со Божјиот Дух, со мудрост, разум, знаење и со секаква вештина,

за да осмислува уметнички изработки, да работи во злато, сребро и бронза,

да сече и вградува камења, да резба дрво и да изработува секакво дело.

Ете, со него го поставив Елиав, син на Ахисамах, од Дановото племе. На сите што имаат мудро срце им дадов мудрост, за да направат сѐ што ти заповедав:

Шаторот на средбата, ковчегот на Сведоштвото, капакот на помирувањето што е над него и сите предмети на шаторот;

трпезата и нејзините предмети, светилникот од чисто злато со сите негови предмети и жртвеникот за темјан;

жртвеникот за жртви паленици со сите негови предмети и садот за миење со неговото подножје;

облеките за службата, светите облеки за свештеникот Арон и облеките за неговите синови, за да служат како свештеници;

маслото за помазание и миризливиот темјан за светилиштето. Нека направат сѐ онака како што ти заповедав.“

Господ уште му рече на Мојсеј:

„Кажи им на Израелевите синови: ‚Задолжително пазете ги Моите саботи, зашто тоа е знак меѓу Мене и вас во сите ваши поколенија, за да знаете дека Јас сум Господ, Кој ве осветува.

Пазете ја саботата, зашто таа ви е света. Кој ќе ја оскверни, нека биде погубен; секој што ќе работи во неа нека биде отстранет од својот народ.

Шест дена нека се работи, а седмиот ден е сабота на целосен одмор, света за Господ. Секој што ќе работи во саботниот ден нека биде погубен.

Израелевите синови нека ја пазат саботата и нека ја празнуваат во сите свои поколенија како вечен завет.

Таа е вечен знак меѓу Мене и Израелевите синови, зашто за шест дена Господ ги создаде небото и земјата, а на седмиот ден престана да работи и се одмори.‘“

Кога заврши да зборува со Мојсеј на Синајската планина, Господ му ги даде двете плочи на Сведоштвото - камени плочи испишани со Божјиот прст.