2 Мојсеева — Излез

Тогаш Господ му рече на Мојсеј: „Сега ќе видиш што ќе му направам на фараонот. Принуден од силна рака, тој ќе ги пушти; да, принуден од силна рака, ќе ги истера од својата земја.“

Бог уште му рече на Мојсеј: „Јас сум Господ.

Му се јавив на Авраам, Исак и Јаков како Семоќниот Бог, но со Моето име Господ не им бев познат.

И го склучив Својот завет со нив дека ќе им ја дадам Хананската земја, земјата во која живееја како туѓинци.

Го слушнав и стенкањето на Израелевите синови, кои Египќаните ги држат во ропство, и се сетив на Својот завет.

Затоа кажи им на Израелевите синови: ‚Јас сум Господ. Ќе ве изведам од товарите на Египќаните, ќе ве избавам од нивното ропство и ќе ве откупам со испружена рака и со големи судови.

Ќе ве земам за Свој народ и ќе ви бидам Бог. Тогаш ќе знаете дека Јас сум Господ, вашиот Бог, Кој ве изведува од египетските товари.

Ќе ве воведам во земјата за која се заколнав дека ќе им ја дадам на Авраам, Исак и Јаков, и ќе ви ја дадам како наследство. Јас сум Господ.‘“

Мојсеј им го кажа тоа на Израелевите синови, но тие не го послушаа поради својата обесхрабреност и тешкото ропство.

Тогаш Господ му рече на Мојсеј:

„Оди кај египетскиот цар фараон и кажи му да ги пушти Израелевите синови од својата земја.“

Но Мојсеј рече пред Господ: „Ете, Израелевите синови не ме послушаа; како тогаш ќе ме послуша фараонот, кога толку тешко се изразувам?“

Господ им зборуваше на Мојсеј и Арон и им даде заповед за Израелевите синови и за египетскиот цар фараон, за да ги изведат Израелевите синови од Египетската земја.

Ова се поглаварите на нивните татковски домови: синовите на Рувим, Израелевиот првенец, беа Енох, Фалу, Есрон и Харми. Тоа се Рувимовите семејства.

Синовите на Симеон беа: Емуил, Јамин, Аод, Јахин, Сохар и Саул, син на една Хананка. Тоа се Симеоновите семејства.

Ова се имињата на Левиевите синови според нивните поколенија: Гирсон, Каат и Мерари. Леви живееше сто триесет и седум години.

Синовите на Гирсон беа Ливни и Семеј, според нивните семејства.

Синовите на Каат беа Амрам, Исар, Хеврон и Озиел. Каат живееше сто триесет и три години.

Синовите на Мерари беа Маали и Муси. Тоа се Левиевите семејства според нивните поколенија.

Амрам ја зеде за жена својата тетка Јохаведа, а таа му ги роди Арон и Мојсеј. Амрам живееше сто триесет и седум години.

Синовите на Исар беа Кореј, Нефег и Зихри.

Синовите на Озиел беа Мисаил, Елисафан и Ситри.

Арон ја зеде за жена Елисавета, ќерката на Аминадав и сестрата на Наасон. Таа му ги роди Надав, Авиуд, Елеазар и Итамар.

Синовите на Кореј беа Асир, Елкана и Авиасаф. Тоа се Кореевите семејства.

Елеазар, синот на Арон, зеде за жена една од ќерките на Футиел, а таа му го роди Финес. Тоа се поглаварите на татковските домови на Левитите според нивните семејства.

Тоа се Арон и Мојсеј, на кои Господ им рече: „Изведете ги Израелевите синови од Египетската земја според нивните чети.“

Тие му зборуваа на египетскиот цар фараон, за да ги изведат Израелевите синови од Египет. Тоа се токму Мојсеј и Арон.

Во денот кога Господ му зборуваше на Мојсеј во Египетската земја,

Господ му рече на Мојсеј: „Јас сум Господ. Кажи му на египетскиот цар фараон сѐ што ти зборувам.“

Но Мојсеј рече пред Господ: „Ете, тешко се изразувам. Како ќе ме послуша фараонот?“